Чурапчы улууһугар «Уйгу туоната» олохтоох оҥорон таһаарыыны сайыннарар территорияны тэрийэр туһунан уураахха СӨ Бырабыыталыстыбатын бэрэссэдээтэлэ Кирилл Бычков илии баттаата.
Уураахха этиллэринэн, маннык территориялар Болугурга, Мугудайга, Соловьевка уонна Чурапчы нэһилиэгэр тэриллиэхтэрэ.
«Уйгу туонатыгар» резидент быһыытынан киирбиттэр элбэх чэпчэтиинэн туһаныахтара.
Резиденнэр 80-тан кырата суох саҥа үлэ миэстэтин таһаарыахтаахтар диэн этиллэр.
Санатан эттэххэ, улуус баһылыга Степан Саргыдаев бэйэ оҥорон таһаарыытын сайыннарыыга туһуламмыт сокуоҥҥа үлэлэһэр туһунан бэйэтин этиитин СӨ Бырабыыталыстыбатыгар киллэрэн турар.
Бу сокуон экономическай сайдыы тэтимнээхтик барыытыгар уонна бэйэ оҥорон таһаарыытын, өҥөлөрү элбэтэргэ туһуланар. Холобур атын улуустар эти оҥорон таһаарар комбинат, комбикорм сыаҕа, туризм, тыа хаһаайыстыбатын уо.д.а. курдук хайысхаларынан резидент буолан үлэлии сылдьаллар.
Елена Макаринская