Бэдэрээччиттэр нэһилиэктэринэн уонна улуус киинигэр гаас утаҕын тардыыга күннэтэ түбүгүрэллэр. Күн бүгүн Чурапчы нэһилиэгин Интэринээт томторугар үлэ күөстүү оргуйар. Үлэһиттэр гаас утаҕын тардаллар, оттон олохтоохтор дьиэлэрин-уоттарын бэлэмнииллэр. Олохтоохтору кытта кэпсэттэххэ, бары гаас киирэриттэн үөрэллэрин биллэрэллэр, сорох-сорохтор субсидияны туһанан, үөрүүлэрэ икки бүк үрдээбит.
Лука Попов, бэдэрээччит:
— Биһиги «Саталстрой” чааһынай тэрилтэ Чурапчы улууһугар үлэлии сылдьабыт. 10-ча үлэһиттээхпин, 2 улахан тиэхиньикэлээхпит. Интэринээт томторугар бастакы түһүмэҕин тартыбыт, 44 ыал холбоноругар анаан стояктар таҕыстылар. Ону таһынан нэһилиэк иһинэн быстах уулуссалары уонна Хадаарга тарда сылдьабыт. Уопсайа 80-ча ыалга тардан биэриэхтээхпит. Болдьохпут атырдьах ыйын 30 күнүгэр диэн этэ да, биһиги эрдэ түмүктээн эрэбит.
Альберт Бродников, интэринээт томторун олохтооҕо:
- Биһиги гааска холбоноору бэлэмнэнэбит, онно анаан туспа гараас тутта сылдьабыт. Стоякпыт номнуо тахсан турар. Гаас үчүгэйэ диэн төһө да улахан эбийиэктэри кыайар кыахтаах, ону тэҥэ төлөбүрэ чэпчэки буолар. Биһиги киинтэн ититиллэр ыал сылы эргиччи 10-нуу тыһыынчаны төлүү олорбут буоллахпытына, мантан ыла кыһынын итиннээҕэр кыраны уонна сайынын олох да төлөөбөт буоларбыт үөрдэр.
Киинтэн ититииттэн гааска көһөргө субсидия көрүллэрэ олус үчүгэй. Нэһилиэк дьаһалтатын көмөтүнэн оһохпутуттан саҕалаан, бытархай наадалаах тэриллэрбитигэр тиийэ ылынныбыт.
Биһиги интэринээт томторун олохтоохторо өр кэтэспит баҕа санаабыт өссө эрдэлээн туолан олуһун үөрэбит. Онон улууспут, нэһилиэкпит баһылыктарыгар уонна дьокутааттарбытыгар улахан махталбын тиэрдэбин.
Владимир Прокопьев, интэринээт томторун олохтооҕо:
- Интэринээт томторун олохтоохторо гаас киирэрин кэтэспиппит ыраатта. Былырыын Ил Дархаммыт 2024 сылга гаас киириэҕэ диэн эрэннэрбитэ. Ол этиитэ туолан, онно сөп түбэһиннэрэ саҥа дьиэ тутуннубут. Гаас үлэһиттэрэ үлэ бөҕөнү ыыта сылдьаллар, стоякпыт туруохтаах сиригэр колышкабытын анньан бэлиэтээтибит.
Гааска холбонууга көрүллэр субсидиянан туһанан, дьаһалтаҕа улахан махталлаахпыт. Онон улууспут олохтоохторун кыстык чугаһаан эрэринэн, бу хаалбыт күннэргэ сүүрэн-көтөн, гааска холбоноллоругар ыҥырабын.
Елена Макаринская