Чурапчы улууһугар өрөспүүбүлүкэҕэ аан бастакытын Ыччат киинин дьиэтэ аһыллан, үлэтэ саҕаламмыт үөрүүлээх тэрээһинигэр СӨ ыччат уонна социальнай коммуникация министирин 1-кы солбуйааччыта Надежда Мохначевская кытынна.
2022 сыллаахха “Чурапчы улууһа” МО баһылыга Степан Саргыдаев көҕүлээһининэн, “Чурапчы нэһилиэгэ” тыа сирин түөлбэтэ баһылыгын Владимир Сивцев өйөбүлүнэн, ыччаты түмэр, көҕүлүүр, сайыннарар, саҥа таһымҥа таһаарар сыаллаах аан маҥнайгытын ыччат киинэ “УТУМ” дьиэтин иһинэн тэриллибитэ. Ол онно “Оҕо саас сирдьиттэрэ”, “Бастыҥнар хамсааһыннара” уонна ыччаттар түмсэн, ыччат киинэ үлэтин күргүөмнээхтик саҕалаабыта, саҥа арыйыылары, хайысхалары оҥороннор үлэ күөстүү оргуйбута.
Киин аһыллыаҕыттан үгүс үлэ ыытыллан, ыччат олоххо тардыһыыта улам улаатан, кэҥээн — ыччат киинэ саҥалыы өрөмүөннэммит дьиэҕэ көһөрө биллибитэ. Оттон быйылгы сылга улуус дьаһалтатын өйөбүлүнэн, үп-ас тыырыллан, элбэх үлэни көрсөн ыччат киинэ, уруккута улуустааҕы киин бибилэтиэкэ дьиэтин сөргүтэн, үлэҕэ киирэн дьон-сэргэ үөрүүтэ үксээтэ.
Саҥалыы, кэрэҕэ, сырдыкка угуйар ыччат киинигэр барыта холбоон 5 тэрилтэ тэҥинэн үлэтин саҕалаата, ол курдук: психологтар, “Бастыҥнар хамсааһыннара”, “Оҕо саас сирдьиттэрэ”, “Юнармия”, Ыччат сүбэтэ уонна волонтердар.
Саҥалыы көрүүлээх, элбэх хайысхалаах ыччат киинэ сылтан–сыл үүнэн, сайдан, кэҥээн иһиэҕэ.
Тэрээһин үөрүүлээх чааһыгар “Чурапчы улууһа” МО баһылыга Степан Саргыдаев,
СӨ ыччат уонна социальнай коммуникация миниистирин 1-кы солбуйаччы Надежда Мохначевская,
улуус нэһилиэктэрин баһылыктарын ааттарыттан “Чурапчы нэһилиэгэ” Тыа сирин түөлбэтин баһылыга Владимир Сивцев,
“Оҕо саас сирдьиттэрэ” Саха сиринээҕи Тирэх Киин салайааччыта, “Саха сирин инникитэ” АНО генеральнай дириэктэрэ Нюргуяна Макарова, СӨ “Юнармия” салайаачыта, өрөспүүбүлүкэтээҕи “Бастыҥнар хамсааһыннарын” салайааччытын солбуйааччы Александр Кузьмин эҕэрдэ тылларын этэн, махтал суруктары, бэлэхтэри туттардылар.
Киин тэриллибит сыала – ыччаты духуобунай, сиэр-майгы өттүнэн сайыннарар култуурунай, креативнай, уопсастыбаннай уонна ыспартыыбынай бырайыактары олоххо киллэрии.
“Чурапчы улууһугар маннык Ыччат киинэ өрөспүүбүлүкэҕэ аан бастакытын аһылынна. Турар сирэ олус табыгастаах, ол курдук бөһүөлэк киинэ буолан бу дьиэ таһыгар оройуоммут култууратын киинэ, оҕо-аймах, ыччат сынньанар Иван Кандинскай аатынан “Айыллаан” киинэ тыйаатыра, Афанасий Софронов аатынан успуорт уораҕайа, аны саҥа биэстии мэндиэмэннээх алта дьиэ, кэлэр нэдиэлэҕэ 53 кыбартыыралаах саҥа эбийиэк үлэҕэ киириэҕэ. Онон барыта санаа хоту баран иһэр. Ыччаттар бу кииҥҥэ саҥаттан-саҥа бырайыактары, хамсааһыннары таһаарыахтара диэммин улаханнык эрэнэбин. Бу бырайыагы өйөөбүт өрөспүүбүлүкэбит Барыбыыталыстыбатыгар, министиэристибэбитигэр тус бэйэм уонна улуус олохтоохторун ааттарыттан улахан махталбын биллэрэбин. Үлэһиттэргэ ситиһиилэри, инники сыаллара-соруктара туоларын баҕарабын”, — диэн Степан Анатольевич санаатын үллэһиннэ.
Сэмэн ЖЕНДРИНСКЭЙ. Ааптар хаартыскаҕа түһэриитэ