Саҥардыы тутуллан үлэҕэ киирбит Таас балыыһабыт өрөбүл даҕаны күннэргэ кураанахсыйбат буолла. Ол курдук бүгүн, урукку кэмнэргэ Чурапчыбыт улууһугар өрө таһаарыылаахтык үлэлээн-хамсаан ааспыт оттон билигин Дьокуускай куорат бастыҥ акушер-гинеколог быраастара оройуоммут участковай биэлсэрдэригэр, терапевт-быраастарыгар, акушер-гинекологтарыгар анаан улахан сэминээр тэрийдилэр.
Манна Дьокуускай куорат Перинатальнай киин дьахталлар консультацияларын гинеколог-бырааһа, СӨ доруобуйатын харыстабылын туйгуна, СӨ оҕолоноору сылдьар дьахталлар мониториннарын салайааччы Вера Титова, Бастакы нүөмэрдээх өрөспүүбүлүкэтээҕи балыыһа Перинатальнай киин гинекологическай отделениетын бырааһа Мария Павлова-Афанасьева, РФ уонна СӨ доруобуйатын харыстабылын туйгуна, ЯРМЯЦ методист-бырааһа, бүгүҥҥү тэрээһиҥҥэ быраастар биригээдэлэрин салайааччыта Вероника Стручкова, Дьокуускайдааҕы медицинскэй киин ультразвуковой методист бырааһа Мария Попова кэлэннэр сүрүн кыһалҕаларга, туһааннаах боппуруостарга тохтооннор методическай уонна практическай чаастарга туһааннаах сүбэлэри-амалары биэрдилэр.
“Бүгүҥҥү сэминээрбитигэр сүрүн иһитиннэриилэри Чурапчы улууһун гинеколог бырааһа Анна Попова, Дьокуускай куораттан кэлбит ыалдьыттарбыт, үрдүкү категориялаар акушер-гинеколог быраастар Вера Титова, Мария Павлова-Афанасьева оҥордулар. Салгыы биһиги оройуоммут быраастара гинекологическай ыарыһахтары көрүүгэ-истиигэ аналлаах боппуруостары биэрэннэр кэпсэтиигэ кыттыстылар. Түгэнинэн туһанан, бүгүн кэлбит исписэлиистэрбитигэр, бэйэлэрэ хаһан эрэ үлэлээн ааспыт, кынат анньынан үүнэн-сайдан тахсыбыт балыыһаларын умнубаккалар, үчүгэйдик санааннар, төннөн кэлэннэр дьон доруобуйатын туһугар кыһаллан туһааннаах сэминээри тэрийбиттэригэр улаханнык махтанабыт”, — диэн Прокопий Сокольников аатынан Чурапчытааҕы киин балыыһа кылаабынай бырааһын эмтиир чааска солбуйааччы э.т Анастасия Юрьевна Пономарева санаатын үллэһиннэ.
Сэмэн Жендринскэй