Бэҕэһээ, Арассыыйа Бэрэсидьиэнин быыбарыгар куоластааһын бастакы күнэ түмүктэммитэ.
Бүгүн, кулун тутар 16 күнүгэр, дойду баһылыгын талар быыбар сарсыарда 8:00 ч. салҕанна. Бэҕэһээҥҥи күн 20:00 ч. түмүгүнэн, улуус олохтоохторо быыбарга кыттыыта 46,30 % тэҥнэспитэ.
СӨ Киин быыбардыыр хамыыһыйатын дааннайынан, биэс бастыҥ көрдөрүүлээх улуустарынан Өлөөн эбэҥки национальнай оройуона (77,56%), Анаабыр национальнай (долгаан-эбэҥки) оройуона (75,58%), Горнай улууһа (58,76 %), Мииринэй оройуона (57,11%), Абый улууһа (56,19%) буолаллар.
“Улууспут 29 учаастага бары арылыннылар, бүгүҥҥү күн үлэтэ саҕаланна. Барыта этэҥҥэ”, — диэн Чурапчытааҕы Киин быыбардыыр хамыыһыйа сэкирэтээрэ Виктория Семеновна иһитиннэрдэ.
Санатар буоллахха, Арассыыйа Бэрэсидьиэнин талыы быыбара кулун тутар 15, 16, 17 күннэригэр ыытыллар.
Сэмэн Жендринскэй