Чурапчы улууһугар үгэскэ кубулуйбут сылы түмүктүүр тэрээһин — Ыччат баала ыытылынна.
Үөрүүлээх тэрээһин улуус ыччатын ааспыт сыллааҕы үлэтин сырдатар видеоролигынан саҕаланна. Ол курдук, балаҕан ыйыттан улуустааҕы ыччат бэлиитикэтин исписэлииһинэн Алгыстаана Федорова ананан ситиһиилээхтик үлэлиир.
Үөрүүлээх тэрээһин улуус ыччатын ааспыт сыллааҕы үлэтин сырдатар видеоролигынан саҕаланна. Ол курдук, балаҕан ыйыттан улуустааҕы ыччат бэлиитикэтин исписэлииһинэн Алгыстаана Федорова ананан ситиһиилээхтик үлэлиир. Кини салайыытынан улуустааҕы ыччат координационнай сэбиэтэ сөргүтүллэн, аҕыйах кэм иһигэр саҥа сүүрээннэр киирдилэр. Чурапчы улууһун тэрилтэлэриттэн ыччат профсойууһун бастакы улахан мунньаҕа буолла. Манна эдэр үлэһиттэр актуальнай тиэмэлэри ырытыстылар, уопсастыбаннай түмсүүлэр уопут атастастылар. Ону таһынан производственнай тэрилтэлэр ыччаттарын сэбиэтэ тэрилиннэ. Нэһилиэктэр ыччаттарын түмэр, көҕүлүүр, тыа сиригэр лидердэри таһаарар сыалтан итиэннэ үлэҕэ кыһалҕалары быһаарыыга улуустааҕы ыччат десана нэһилиэктэринэн үлэлээтэ.
Маны таһынан биир улахан хамсааһынынан улуустааҕы Ыччат киинин дьиэтин үөрүүлээх аһыллыыта буолла. Ыччат киинэ кэҥээн, кыһалҕалаах дьоҥҥо көмөлөһөргө, ыччат дьоҕурун, талаанын, сатабылын сайыннарарыгар, чөл олоҕу тарҕатыыга, саҥа саҕалааһыннары өйүүргэ сөптөөх усулуобуйа тэрилиннэ.
Сыл түмүгүнэн бастыҥнары чиэстиир үөрүүлээх чааска улуус дьокутааттарын Сэбиэтин бэрэссэдээтэлэ Яков Оконешников, улуус баһылыгын социальнай боппуруостарга солбуйааччы Мария Кронникова эҕэрдэ тылы эттилэр итиэннэ улуус сайдыытыгар кылааттарын киллэрэр көхтөөх ыччаттарга махтанан туран, наҕараадалары туттардылар.
Салгыы улуус ыччатын үрдүкү бириэмийэтин туттарыы сиэрэ-туома буолла. Ол курдук, «Бастыҥ уопсастыбаннай түмсүү» анал аат «Эрэл» эдэр педагогтар ассоциацияларыгар, «Бастыҥ уопсастыбанньык» анал аат Чурапчы нэһилиэгин ыччатыгар Антон Фомиҥҥа, «Прорыв года» анал аат Чурапчы нэһилиэгин ыччатыгар Аман Винокуровка, «Сыл бастыҥ волонтера» анал аат С.А. Новгородов аатынан Чурапчы орто оскуолатын үөрэнээччитигэр Аэлита Старостинаҕа туттарылынна. Чурапчыга Ыал саргытын сылынан быйыл «Сыл бастыҥ эдэр ыала» номинация кыайыылааҕынан уон ыал ааттанна: Сылаҥтан Афанасий, Айыына Говоровтар, Петр, Саргылаана Трофимовтар, Чурапчыттан Василий, Татьяна Слюгровтар, Соловьевтан Михаил, Күннэй Николаевтар, Кытаанахтан Василий, Туйаара Потаповтар, Арыылаахтан Николай, Светлана Демьяновтар, Одьулуунтан Петр, Анжелика Жегусовтар, Болтоҥоттон Афанасий, Анна Григорьевтар, Бахсыттан Дьулустан, Күннэй Пестряковтар, Хадаартан Петр, Лидия Григорьевтар.
«Сылтан сыл аайы Ыччат баалыгар эдэр дьон кэлиитэ элбээн иһэрэ үөрдэр. Быйыл 17 нэһилиэктэн 13 нэһилиэк ыччата улахан дэлэгээссийэнэн олус бэлэмнэнэн кэлэн, куонкурустарга көхтөөхтүк кытыннылар. Бу ыччат тэрээһинигэр суолта уураллара көстөр. 2025 сылга Арассыыйаҕа, өрөспүүбүлүкэҕэ Дойдуга бэриниилээх буолуу сыла биллэриллэн, ыччаты, оҕону патриотическай иитиигэ сүрүн болҕомто ууруллуоҕа. Онуоха тыа сиригэр ыччат олохсуйуутугар, төрөөбүт дойдубут, нэһилиэкпит сайдыытыгар туһуламмыт бырайыактар, саҥа сүүрээннэр олоххо киирэ туруохтара диэн эрэнэбин», — диэн ыччат исписэлииһэ Алгыстаана Федорова билиһиннэрдэ.
Ити курдук, ааспыт сыл үтүө түмүктэрдээх, ситиһиилээх буолла. Инникитин даҕаны өссө интэриэһинэй түгэннэр тосхойуохтара, төрөөбүт улууспут чэчирии үүнэ-сайда турарын туһугар ыччат дьон үлэлиэхтэрэ-хамсыахтара.
Марфа Петрова.