Алын сүһүөх кылаас оҕолоругар аналлаах “Арассыыйа хотойчоонноро” слет илин эҥэрдээҕи түһүмэҕэ түмүктэннэ. 150-ча киһилээх тэрээһин үрдүк таһымнаахтык ааспытын бука бары бэлиэтии көрдүлэр, улаханнык астыммыттарын биллэрдилэр.
“Былырыын салайааччыбыт Ньургуйаана Макарова, үөрэх управлениетын начаалынньыгын уонна улуус баһылыгын кытары көрсүһэннэр, атын улуустарбыт кэлэллэригэр-баралларыгар табыгас буоллун диэн или эҥэргэ кииннээн сытар Чурапчы улууһун былаһааккатын талбыттара. Мантан инньэ илин эҥэрдэр сылын аайы Чурапчы улууһугар мустар буолабыт оттон киин улуустар Хаҥаласка, Бүлүү бөлөхтөр Үөһээ Бүлүү оройуонугар мустаннар слеттуохтара. Чурапчылар олус үчүгэйдик тэриммиттэр, Евгения Ивановна олус түргэнник дьоннорун түмэ тардан бэркэ тэрийдилэр. Бу билигин бэйэлэрин үчүгэйдик көрдөрбүттэр кэлэр үөрэх дьылыгар о.э. 4 кылаас буолууларыгар федеральнай таһымҥа ыҥырыллан кыттыахтара”, — диэн “Росдетцентр” олохтоох ресурснай киин бырайыактары уонна бырагырааммалары киллэриигэ отделын сүрүн үлэһитэ, СӨ “Арассыыйа хотойчоонноро” бырагыраамма куратора Светлана Ефремова кэпсээтэ.
Слет кыттыылаахтара уустук сорудахтаах, моһоллордоох 12 түһүмэҕи аастылар. Оҕолор күрэхтэһэр сынньанар кэмнэригэр хамаандалар салайааччылара, төрөппүттэр, тэрийээччилэр бука бары биир киһи курдук сүүрдүлэр-көттүлэр.
Чөмчүүнэ Охлопкова, Томпо улууһун Саһыл орто оскуолатын 3 кылааһын туйгун үөрэнээччитэ: “Биһиги биир настаабынньыктаах, учууталбытын алтыа буолан кэлбиппит. Мааҕыын сарсыарда 6 чаастан айаннаан кыратык хойутаан кэллибит. Чурапчы оройуона улахан баҕайы эбит, оҕолору көрөн үөрдүбүт. Күрэхтэһии түһүмэхтэриттэн “Орленок — спортсмен” арыый уустук курдук уоннааҕыта барыта үчүгэй”.
Диана Христофорова, Чурапчы нэһилиэгин Семен Новгородов аатынан Чурапчы орто оскуолатын 3 “а” кылааһын үөрэнээччитэ: “Үчүгэй баҕаыйы куонкурустар буоллулар, олус интэриэһинэйдэр. Биһиги бу слекка эрдэттэн бэлэмнэммиппит, учууталбыт олус кыһаллан туран бэлэмнээбитэ. Ити хас биирдии станция сорудахтара үчүгэйдэр эрээри “Орленок-хранитель” диэн бэйэбит Сахабыт сирин туһунан ыйытыктар бааллара буоллар наһаа үчүгэй буолуох этэ. Инникитин атын сиргэ, холобура пааркаҕа эбэтэр стадиоҥҥа, өссө элбэх оҕолору ыҥыран кытыннараллара буоллар”.
Тэрээһин, күрэхтэһии буолан баран барыта бүтэр уһуктаах, үтүө түмүкттээх буолар:
- “Очумелые ручки” номинация – Томпо улууһун Саһыл орто оскуолата;
- “Умники и умницы” номинация — Томпо улууһун Мэҥэ Алдан орто оскуолата;
- “Герои нашего времени” – Семен Новгородов аатынан Чурапчы орто оскуолата;
- “Самые активные” – Мэҥэ Хаҥалас улууһун Тиэлиги орто оскуолата;
- “Интеллектуалы” – Уус Алдан улууһун Лөгөй интэринээт-лицейа;
- “Орлята-математики” – Амма улууһун лицейа;
- “Самые ловкие” – Таатта улууһун лицейа;
- “Спортивный дух” – Чурапчы улууһун Семен Флегонтов аатынан Хадаар орто оскуолата;
- “Орлята-патриоты” – Уус Алдан улууһун Бэйдиҥэ орто оскуолата;
- “Дружная команда” – Мэҥэ Хаҥалас улууһун Төҥүлү орто оскуолата;
- “Творчество и талант” – Амма улууһун Сатаҕай орто оскуолата.
Сэмэн Жендринскэй. Ааптар хаартыскаҕа түһэриитэ