Былырыын о.э 2024 сыл кулун тутар 27 күнүгэр, “Чурапчы” ТХПК саҥа бэрэссэдээтэлинэн тыа хаһаайыстыбатын эйгэтигэр улахан уопуттаах Николай Петров анаммыта.
Сылы кыайбат кэм иһигэр, улуус баһылыга Степан Саргыдаев өйөбүлүнэн уонна “Чурапчы” ТХПК түмсүүлээх кэлэктиип күүстээх үлэтинэн тэрилтэ балаһыанньата лаппа тубуста, үлэһиттэр хамнастара быйылгы дьыл тохсунньу ыйыттан 25% үрдээтэ. “Дьон-сэргэ настырыанньалаах үлэлэригэр кэлэр буоллулар”, — диэн Николай Ильич бэлиэтиир. Ааспыт сыл бүтүүтүгэр улуус дьаһалтатын Тыатын хаһаайыстыбатын управлениета — быйылгы 2025 сылга 6 тыһыынчаттан туонна үүтү тутарга кытаанах сыалы-соругу туруорбута.
Онуоха, сатабыллаах салайааччы уһуну-киэҥи толкуйдуу барбакка Алтайскай кыраай Барнаул куоратыттан “Убойный корм” Дмитрий Константинович Белячиков салайааччылаах
алта киһиттэн састааптаах дэлэгээссийэтин бүгүн Чурапчы улууһугар ыҥыран аҕалан, үлэ хамыытын билиһиннэрэ сылдьар.
“Биһиги бурдукпут бастатан туран үүт хаачыстыбата биллэ үрдүүрүгэр туһуланар. Ол курдук тиһигин быспакка биир кэм сиэтэр буоллахха биир ынахтан быһа барыллаан сылга 6 тыһыынчаттан тахса лиитэрэ үүтү ылыахха сөп буолар. Бурдук састаабыгар сүрүннээн дьэһимиэн буолар итиннэ арааһынай ферменнэри, пробиотиктары эбэн Липецкэй уобалас собуотугар оҥорон таһаарабыт. Сылтан сыл аайы бурдукпут састаабын кэтээн көрүү түмүгүнэн тупсарабыт, эбэбит, сорох өттүн уларытабыт – ити түмүгэр үчүгэй көрдөрүүлэр бааллар. Биһиги собуоппутугар 2020 сылтан саҥалыы оборудованиелар туруорулланнар оҥорон таһаарар бородууксуйабыт үрдүк хаачыстыбалааҕын мэктиэлиир. Саха сирин кытары биһиги үһүс сылбытын үлэлэһэбит, биһигини кытары ыкса үлэлэһэр оройуоннар бааллар. Холобура, ааспыт 2024 сыл түмүгүнэн Саха сирэ биһигиттэн 40% элбэх бородууксуйаны сакаастаата, быйылгы дьыллаахха өссө элбиэ диэн эрэнэбит, ол курдук бүгүн Чурапчы улууһугар кэллибит итиэннэ өссө эбии биэс хас дуогабары атын оройуоннары кытары баттаһаары былаанныыбыт. Биллэн туран биһиги комбикорм-ут сыаната чэпчэки сыаналаах буолбатах, мааркабыт “Убойный корм” дэнэр. Манна аҕалар атын комбикорм-тан сыанабыт төһө даҕаны 10-15% үрдүк буолбутун иһин, хаачыстыба өттүнэн үчүгэй буоларбытын бириэмэ көрдөрдө”, — диэн атыы-эргиэн отделын салайааччыта Денис Александрович Орлов кэпсээтэ.
“Чурапчы” ТХПК бэрэссэдээтэлэ Николай Петров уонна “Убойный корм” ХЭТ генеральнай дириэктэрэ Дмитрий Белячиков икки ардыларыгар хардарыта сөбүлэҥ түһэрсэн дуогабарга илии баттанна. Онон Чурапчы улууһа кулун тутар ый бүтүүтэ, биир вагон ол эбэтэр 67,5 туонна үрдүк хаачыстыбалаах комбикорму күүтэр.
Сэмэн ЖЕНДРИНСКЭЙ. Ааптар хаартыскаҕа түһэриитэ