Ытык Таатта сиригэр – уотугар, кыраһыабай айылҕалаах Чычымах нэһилиэгэр Олег Лукич Ючюгяев сырдык аатынан Саха Сирин төрүт оҕунан ытыыга өрөспүүбүлүкэ чөмпүйэнээтэ буолла. Уопсайа 18 улуустан 197 охчут кытынна. Чурапчы улууһуттан 16 кыттааччы ситиһиилээхтик күрэхтэстэ.
Иккис категория бэтэрээн дьахталлар бөлөхтөрүгэр үчүгэй ытыылары көрдөрөн Ангелина Кузьмина иккис бочуоттаах миэстэни ылла. Бастакы категорияҕа Саха сирин успуордун маастардара, эдьиийдии балыс Дария Фомина 1-кы, Эльвира Ефимова 2-с буолары ситистилэр. Кинилэр тэҥнээхтэрин булбатылар.
Дьахталлар бөлөхтөрүгэр Наталья Ефимова түмүктүүр киирсиигэ очукуота тэҥнэһэн, эбии ытыыга тахсан, бэрт кыранан хотторон иккис миэстэни ылла. Кини бу күрэххэ спорт маастарын кандидатын нуорматын толордо.
Эр дьоҥҥо Владислав Корякин 3-с миэстэни ситистэ.
Биирдиилээн киирсии кэнниттэн 8 үчүгэй көрдөрүүлээх хамаандалар күрэхтэстилэр. Манна Чурапчы хамаандата эрэллээхтик бастаата. Хамаанда састаабыгар Дария Фомина, Наташа Ефимова, Христофор Дьячковский уонна Владислав Корякин киирдилэр. Охчуттар бүтэһик кыайыылаах очукуоларын Саха сирин спордун маастара, ДЮСШ тренера Барыс Баишев салайыытынан сөптөөх тактиканы тутуһан ыллылар. Онон кыайыы өрөгөйүн биллилэр. Дьокуускай хамаандата биир очукуонан хаалан иккис миэстэ, Нам хамаандата үһүс миэстэ буоллулар.
«Саҥа олох” хаһыат кэр.