Кэнники сылларга тыа сирин сайдыытыгар олохтоох дьон этиилэрин көҕүлээн ол ону өйүүр бырагыраамма баар буолан, Александр Федотов аатынан успуорт уораҕайыгар тыһыынчанан киһи түмсэн, куоластаан, кыайбыппыт-хоппуппут, нэһилиэк сайдыытыгар кылааппытын киллэсибиппит хаһыс да сылыгар барда.
Урукку сыллары аҕыннахха, 2017 сыллаахха 1,5 тыһыынча киһи мустан куоластаабытын түмүгэр “Айыллаан” сынньалаҥ киинигэр хапытаалынай өрөмүөн ыытыллыбыта. 2018 сыллаахха “Молодежнай” ТОС-ка сайыҥҥы уу ситимэ тардыллыбыта, “Мурун Тыымпыйа” ТОС-ка Природная, Хатыҥнаах, Пятилетка, Нерюнгринская аатынан уулуссаларга сырдатыы үлэтэ ыытыллыбыта уонна Егор Барахсанов аатынан култуура-сынньалаҥ пааркатыгар саҥа аттракцион кэлбитэ.
2019 сыллаахха “Маарыкчаан”, “Спортивнай”, “Куоҕалы” ТОС-тар уулуссаларыгар сырдатыы уот киирбитэ.
2020 сыллаахха “Чараҥ” ТОС-ка уулусса уота холбоммута, уопсастыбаннай баанньык өрөмүөннэммитэ, Ленин аатынан уулуссаҕа тротуар оҥоһуллубута.
2021 сыллаахха “Молодежнай” ТОС-ка уулусса уотун сырдатыы, “Спортивнай” ТОС-ка сайыҥҥы уу ситимин холбооһун, “Мурун Тыымпыйа” ТОС-ка Федоров, Севернай, Юбилейнай аатынан уулуссалары уотунан сырдатыы үлэлэрэ ыытыллыбыттара.
2022 сылга Павел Пинигин аатынан уулуссаҕа тротуар, Улуу Өктөөп 50 сылыгар анаммыт мемориалы күрүөлээһин, “Мурун Тыымпыйа” ТОС-ка уулусса уотун сырдатыы үлэтэ күргүөмүнэн тэриллибитэ.
2023 сылга “Куоҕалы” ТОС-ка Дьуон Дьаҥылы, Күн Дьирибинэ, Субуруускай, Куоҕалы ааттарынан уулуссаларга сырдатар уоту киллэрии, Павел Пинигин аатынан уулуссаҕа тротуар оҥоруута, “Чараҥ” ТОС-ка ыспартыыбынай былаһаакканы саҥардыы үлэтэ барбыта.
Быйылгы дьыллаахха “Молодежнай” ТОС-ка Софронов, Молодежная, Василий Яковлев, Протодьяконов аатынан уулуссалары уотунан сырдатыы, “Маарыкчаан” ТОС-ка Октябрьскай, Прокопьев, Макаров, Ойуунускай, Ленин аатынан уулуссаларга сайыҥҥы уу ситимэ тардыллан олоххо киирбитэ. Итини сэргэ, күн-бэҕэһээ, “Мурун Тыымпыйа” ТОС-ка 120 миэтэрэ уһуннаах “Сэттис халлаан” тимир муоста, 80 миэтэрэ уһуннаах билииккэ тротуары дьон-сэргэ хаамарыгар анаан үтүө суобастаахтык оҥорон үлэҕэ киллэрдилэр.
Оттон бүгүн о.э. алтынньы 3 күнүгэр, Чурапчы нэһилиэгин дьаһалтата көҕүлээһининэн, тэрилтэ салайааччылара, биирдиилээн дьон, устудьуоннар, ыччаттар мустаннар барыта холбоон — 1086 киһи, олохтоох нэһилиэнньэ өйүүр бырагыраамматын куоластааһыныгар 5 бырайыагы көрдүлэр.
Мунньах сэкирэтээринэн Чурапчы нэһилиэгин дьаһалтатын тутуу уонна архитектура отделын сүрүннүүр исписэлииһэ Динара Андреева олордо.
Ол иннинэ, нэһилиэнньэ олоҕор ордук туһалаах, тиийимтиэ буоларын туһугар
улуус дьокутааттарын Сэбиэтин бэрэссэдээтэлэ Яков Оконешников,
улуус баһылыгын тутуу боппуруостарыгар солбуйааччы Афанасий Дьячковскай,
“Чурапчы нэһилиэгэ” тыа сирин түөлбэтин баһылыга Владимир Сивцев биир-биир тураннар тыл эттилэр.
Бу сырыыга нэһилиэнньэ 5 бырайыагы көрдө, онно Иван Кандинскай аатынан “Айыллаан” култуура киинигэр аныгылыы көстүүлээх парковка, “Мурун Тыымпыйа” ТОС-ка тротуар оҥоруутун тиһэҕэр тиэрдии, “Куоҕалы” ТОС-ка сайыҥҥы уу ситимин киллэрии, Александр Федотов аатынан успуорт уораҕайыгар хапытаалынай өрөмүөн, “Сатабыл аартыга” диэн талааннаах оҕолору сайыннарыыга, бэйэлэрин булуналларыгар сөптөөх эйгэни тэрийии курдук этиилэр киирдилэр.
Олохтоохтортон бу киирбит бырайыактарга санааларын “Айыллаан” КК исписэлииһэ Петр Дьяконов,
урбаанньыт, саҥаны айааччы Иннокентий Новгородов,
Чурапчы улууһун үөрэҕин управлениетын исписэлииһэ Мотрена Филиппова,
Александр Федотов аатынан успуорт уораҕайын дириэктэрэ Александр Неустроев,
“Үөрүү” оҕо дьоҕурун эбии сайыннарар киин салайааччыта Ирина Сергеева этиннилэр.
Түмүккэ, мустубут тыһыынчанан ахсааннаах киһи бука бары биир тыынынан киирбит этиилэри, бырайыактары 100% куоластаан эһиилги 2026 сылга олоххо киирэллэригэр эрэл санаалаах тарҕастылар.
Сэмэн Жендринскэй. Ааптар хаартыскаҕа түһэриитэ