Чурапчы нэһилиэгэ тэриллибитэ 375 сылын итиэннэ үүммүт 2024 сылы уруйдаан көрсөр бэлиэ түгэн буолан ааста. Манна ааспыт сыл бастыҥнара, комплекснай, ТОС-нан ыспартакыйаадалар кыайыылаахтара ааттаннылар.
Үөрүүлээх дьаһалга Чурапчы улууһун баһылыга Степан Саргыдаев, улуус дьокутааттарын Сэбиэтин бэрэссэдээтэлэ Яков Оконешников, СӨ Ил Түмэн дьокутаата Дмитрий Поисеев, Чурапчы нэһилиэгин баһылыга Владимир Сивцев, нэһилиэк дьокутааттарын Сэбиэтин бэрэссэдээтэлэ Василий Гуляев кыттыыны ыллылар.
Чурапчы нэһилиэгин Бочуоттаах олохтооҕо аат, үлэ бэтэрээнигэр, Чурапчы нэһилиэгин өрөгөй ырыатын ааптарыгар Василий Пермяковка-Татыана Уола Баһылайга иҥэрилиннэ. “Тоҕус томтор” бочуоттаах бэлиэнэн, СӨ бочуоттаах казначейа, финансовай сулууспа туйгуна Иннокентий Матвеев наҕараадаланна. Чурапчы нэһилиэгин норуот маастарын анал аата, “Силис”, “Кустугу куустарабыан”, “Хоруоҥка” куруһуоктар салайааччыларыгар Надежда Слепцоваҕа иҥэрилиннэ. Чурапчы нэһилиэгин бочуотунай грамотатынан, өйдөбүнньүк чаһытынан, “Саҥа олох” хаһыат үрдүкү кэрэспэдьиэнэ Семен Жендринскэй наҕараадаланна.
ТОС-тар икки ардыларынааҕы күрэххэ, 1 миэстэ – “Спортивнай” ТОС, салайааччы Семен Колодезников, 2 миэстэ – “Куоҕалы” ТОС , салайааччы Федора Седалищева, 3 миэстэ – “Мурун Тыымпыйа” ТОС, салайааччы Елена Семенова.
«Чыпчаал» бириэмийэлэр туттарылыннылар, манна: “Бастыҥ тэрилтэ” – “Туллукчаан” уһуйаан (сэбиэдиссэй Альбина Варламова), “Бастыҥ профсойуус бэрэссэдээтэлэ” – Семен Колодезников, “Чурапчы кэскилэ” – Семен Новгородов аатынан Чурапчы орто оскуолатын 10 кылааһын үөрэнээччитэ Аэлита Старостина, “Сыл бастыҥ спортсмена” – көҥүл тустууга СӨ икки төгүллээх чөмпүйүөнэ Никита Софронов, “Эрэллээх эркин” – анал байыаннай дьайыы кытыллааҕа Айаал Павлуцкай, “Бастыҥ урбаанньыт” – “Эрилик” маҕаһыын хаһаайына Петр Филиппов, “Сыл бастыҥ үлэһитэ” – Чурапчытааҕы “Саха” НКИХ филиалын дириэктэрэ Анна Семенова, “Бастыҥ уус-уран самодеятельность бөлөҕө” – “Мичээр” үҥкүү ансаамбыла, сал. Дария Кузьмина, “Бастыҥ уопсастыбаннай түмсүү” – нэһилиэк Ытык Сүбэтэ буоллулар.
Маны таһынан хас даҕаны киһиэхэ анал истипиэндийэлэр туттарылыннылар. Нэһилиэктэр тэрилтэлэрин икки ардыларыгар ыспартакыйаада кыайыылаахтара ааттаннылар.
Түмүккэ, нэһилиэк баһылыга Владимир Дмитриевич үүммүт 2024 сылы – Чөл олох сылынан биллэрдэ, итиэннэ бэлиэ дьылбыт символын, Чурапчытааҕы судаарыстыбаннай физическэй култуура уонна успуорт үнүстүүтүн ректорыгар Иннокентий Готовцевка үөрүүлээх быһыыга-майгыга туттарда.
Сэмэн Жендринскэй. Ааптар хаартыскаҕа түһэриитэ