Чурапчы улууһун доруобуйаларынан хааччахтаах уопсастыбатын Үрүҥ тунах ыһыаҕа кэрэ айылҕалаах Имигиттэ алааска буолла. Уопсайа 11 нэһилиэктэн кэлэн кытыннылар.
Араас сонун күрэхтэһиилэр буоллулар. Ол курдук, салгын саатынан ытыыга тыҥааһыннаах киирсиилэри сэргээн көрдүлэр. Бу көрүҥҥэ 23 киһи кытынна. Күрэхтэһии түмүгүнэн Василий Пономарев (Чурапчы) бастакы, Анатолий Кузьмин (Мындаҕаайы) иккис, Петр Неустроев (Мындаҕаайы) үһүс миэстэлэргэ тиксэн, үөрүү өрөгөйүн биллилэр.
Быйыл бастакытын мини-мас тардыһыыта ыытылынна, онно эр дьоҥҥо Абрам Гермогенов (Мындаҕаайы), дьахталларга Зоя Алексеева (Чурапчы) муҥутуур кыайыылаахтарынан ааттаннылар.
Халадаайдаах сүүрүүгэ эдэрдэргэ Марина Степанова (Чурапчы) бастаата, иккиһинэн Александра Шамаева (Чурапчы), үсүһүнэн Евдокия Протодьяконова (Сылаҥ) биэтэккэ кэллилэр. Оттон бэтэрээннэргэ Парасковья Новгородова (Кытаанах) иннигэр кими да түһэрбэтэ. Кини кэнниттэн Надежда Хоютанова (Мырыла), Александра Елисеева (Хадаар) бириистээх миэстэлэргэ тигистилэр. Сахалыы таҥастаах сүүрүүгэ уолаттарга Прокопий Наумов (Дириҥ) түһүлгэ быһый сүүрүгүнэн ааттанна. Петр Елисеев (Чурапчы), Александр Собакин (Дириҥ) иккис-үһүс миэстэлэри ыллылар. Бэтэрээннэргэ Афанасий Артемьев (Мындаҕаайы) биэтэги бастакынан булла, кини кэнниттэн Василий Пономарев (Чурапчы), Федор Дьячковскай (Төлөй) утуу-субуу кэллилэр.
Саламаат астааһыныгар уопсайа 5 нэһилиэк кыттыыны ылла. Ол курдук, Чурапxы нэһилиэгиттэн Мария Алексеевна Владимирова саламаата “Саамай арыылаах саламаат” номинацияҕа тигистэ. Оттон Чыаппараттан Александра Алексеевна Андреева “Төрөөбүт күннээх саламаатынан” ыһыах дьону кутун тутта. “Эр киһи саламааччыт” аатын Хатылыттан Семен Владимирович Деляев ылла. Элбэх көрүҥнээх саламааччыттарынан Мындаҕаайыттан Марианна Васильевна Старостина уонна Одьулуунтан Александра Изотовна Неустроева ааттаннылар.
Быйылгы сахалыы таҥас куонкуруһа улууспутугар биллэриллибит Ыал саргыта сылга ананна. Онон кыттааччылар да элбэхтэр, бириистэр да боччумнар. Онуоха Дириҥтэн Саргыдаевтар дьиэ кэргэн бастакы миэстэни ылан, ИП Герман Олегович Белолюбскай салайар “Харысхан” тэрилтэттэн 10000 солк. суумаҕа миэбэл оҥорторор буоллулар. Мындаҕаайыттан Саввиннар дьиэ кэргэн иккискэ тиксэн, “Сити-Стиль” эргиэн киинин салайааччыта Евдокия Васильевна Оконешникова олохтообут 5000 солк. харчынан бирииһи туттулар. Оттон Мырылаттан Хоютановтар дьиэ кэргэн үһүс миэстэҕэ тахсан, ИП Михаил Афанасьевич Данилов анаабыт бирииһин плед суорҕаны ыллылар. Төрдүс кыттааччыларга Дириҥтэн Собакиннар дьиэ кэргэҥҥэ ИП Яна Ивановна Сивцева биһирэбил бирииһин – Чурапчы мүөтүн сэртипикээтин анаата. Бары спонсордарбытыгар улахан махталбытын тиэрдэбит. Барыгытыгар үтүөнү, кэрэни, сырдыгы, ырааһы, элбэх ситиһиилэри баҕарабыт.
Саҥа көрүҥ күрэхпитинэн корнхолл диэн оонньуу буолла. Онно 1м Николай Барашков (Кытаанах), 2 м Иван Хоютанов (Мырыла), 3м Андриан Соловьев (Мырыла) ыллылар
Култуурунай тэрээһиммитигэр айар кут абылаҥар ылларбыт дьоммут бэйэлэрэ айбыт иэйиилээх хоһооннорун ааҕан уонна сонун ырыалары ыллаан, мустубут дьон кэрэхсэбилин ыллылар. Бары кыттааччыларбыт наһаа үчүгэйдик бэлэмнэнэн кэлэн, бары да чаҕылхай талааннаах дьон буолан биэрдилэр, онон барыларыгар Туоһу сурук туттарылынна. Бу куонкурус түмүгүн кыһын декадабытыгар бэлиэтиэхпит.
Ити курдук, үрүҥ тунах ыһыах түһүлгэтигэр алгыс ылан, дуоһуйа сынньанан, айылҕалыын алтыһан, күүс-сэниэ ылынан тарҕастыбыт. Куруутун маннык бары бииргэ түмсэн, үтүөнү үксэтэ, кэрэни кэрэхсии, үөрүүбүтүн үллэстэ сылдьыаҕыҥ. Олох хас биирдии күнүн бэлэх курдук ылынан, сырдыкка талаһа туруоҕуҥ.
Саргылана Хоютанова.