Байыаннай дьайыыга сылдьар ыччаттарбытын анал таҥаһынан-сабынан хааччыйыыга анаан “Илии сылааһа” диэн өрөспүүбүлүкэтээҕи дьахталлар уонна ийэлэр хамсааһыннара бу күннэргэ акция биллэрдилэр. Акцияҕа олоҕуран, бу күннэргэ улуустартан 15 иистэнньэҥнэр хамаандалара саллааттарга итии таҥас анал кэмпилиэктэрин тигиигэ күрэхтэһэллэр. Күрэхтэһии 3 күн устата ыытыллар.
Чурапчы улууһун дьахталларын түмсүүтэ уонна “Арассыыйа ийэлэрэ” хамсааһын улуустааҕы салаата бу акцияҕа кыттыһан, таҥастары тигэн саҕалаатылар. Хамаанда салайааччыта Надежда Ахматова бу туһунан санаатын үллэһиннэ: “Тигиэхтээх матырыйаалбытын тиксэрдилэр. Бүгүҥҥүттэн күрэхтэһиибит саҕаланна. Хамаандабытыгар 7-бит. Улууспут биллэр-көстөр иистэнньэҥнэрэ, анал чааһынай урбаанньыттар кытталлар. Уопсайа, 7 кэмпилиэк таҥаһы тигэн балаҕан ыйын 18 күнүгэр Дьокуускайга тиксэриэхтээхпит. Үлэбит түмүгүн сыаналаан, анал номинациялар олохтоммуттар. Онон бииргэ үлэлиир хамаандабар ситиһиилэри баҕарабын. Байыаннай дьайыыга сылдьар уолаттарбытыгар итии таҥастары тигэн, бэйэбит сэмэй кылааппытын киллэрсэбит. Этэҥҥэ дойдуларыгар бары эргиллэллэригэр баҕарабыт.”
Анна Захарова.