Бүгүн, күөххэ үктэнэр күммүтүгэр буойун-учуутал Степан Кузьмич Макаров аатын сүгэр Чурапчы гимназиятыгар тиһэх чуораан чугдаарда. Бырааһынньыгы көрсө халлааммыт сылыйан, күммүт чаҕылыччы тыган, дьон-сэргэ, оҕо-аймах үөрүүтүн үксэттэ.
Быйыл бу үөрэх кыһатын, 11-с «а», «б» кылааһы 42 оҕо бүтэрэн олох киэҥ аартыгар үктэнэр. Кинилэр ортолоругар 5 кыһыл уонна 7 үрүҥ көмүс мэтээллэргэ үлэлиир үөрэнээччилэр бааллар. Кылаас салайааччыларынан үрдүк категориялаах учууталлар Зоя Сивцева, Кыыдаана Екечьямова буолаллар. Маны тэҥэ 9-с «а», «б» кылааһы 46 оҕо ситиһиилээхтик бүтэрдилэр.
Үөрэнээччилэри долгутуулаах бэлиэ түгэнэринэн оскуола дириэктэрэ Юрий Слепцов, улуус баһылыгын бастакы солбуйааччы Егор Сивцев, нэһилиэк баһылыгын социальнай боппуруостарга солбуйааччы Варвара Макарова уонна улуустааҕы үөрэх салалтатын начаалынньыга Юрий Посельскай уо.д.а. эҕэрдэлээтилэр. Онтон биирдиилээн үрдүк көрдөрүүлээх үөрэнээччилэргэ, бастыҥ актыбыыстарга улуус, нэһилиэк наҕараадаларын, тэрилтэлэр, уопсастыбаннай түмсүүлэр олохтообут бириэмийэлэрин туттардылар. Саха алпабыытын төрүттээччи Семен Новгородов бириэмийэтинэн 11 «б» кылаас үөрэнээччитэ Петр Слепцов, биллиилээх политическай, судаарыстыбаннай диэйэтэл Иван Винокуров бириэмийэтинэн 9 «б» кылаас үөрэнээччитэ Иван Лукин уонна буойун-учуутал Степан Кузьмич Макаров стипендиятынан 11 «б» кылаас үөрэнээччитэ Алексей Абрамов чиэстэннилэр.
Бу күн выпускниктар төрөппүттэрэ оҕолорун эҕэрдэлээн туран, «Ankharob» диэн үгүс ыччат сөбүлээн истэр ырыаһытын ыҥыран ыллаттылар. Үөрэнээччилэр хас биирдии нүөмэри дохсун ытыс доҕуһуолунан, күргүөмнээх хаһыынан көрүстүлэр.
Салгыы 11-с кылаастар үгэскэ кубулуйбут вальс намыын муусукатыгар уйдаран үҥкүүлээтилэр. Онтон хас биирдии үөрэппит учууталларыгар махтанан туран, тыыннаах сибэкки дьөрбөтүн бэлэх ууннулар. Олоххо умнуллубат бырааһынньык Тиһэх чуораан чугдаарар тыаһынан түмүктэннэ.
Чурапчы гимназиятын 29-с выпуһугар биир кэлим эксээмэннэрин ситиһиилээхтик туттаран, сөбүлээн талбыт идэлэригэр туттарсан киирэллэригэр баҕарабыт.
Марфа Петрова.