Арассыыйа бырабыыталыстыбата 15 эрэгийиэҥҥэ, ол иһигэр Саха сиригэр, тыа хаһаайыстыбатын сирдэрин оҥорууга үлэ ороскуотун толуйуу быһыытынан эбии 630 мөлүйүөнтэн тахса солкуобайы көрбүт диэн СӨ Ил Дарханын уонна Бырабыыталыстыбатын пресс-сулууспата иһитиннэрэр.
Онон тыа хаһаайыстыбатын бородууксуйатын оҥорооччулар бырайыактарын талан ылыы буолбут.
СӨ Тыа хаһаайыстыбатын министиэристибэтэ иһитиннэрбитинэн, Чурапчы улууһуттан фермер Алексей Трофимов бырайыага талыллыбыт. Тыа хаһаайыстыбатын бородууксуйатын оҥорон таһаарааччыга мастары, талахтары, дулҕалары ыраастыыр үлэни ыытарыгар 447 тыһыынчаттан тахса солкуобай көрүлүннэ. Ыраастаан бүтэн баран, бу сиргэ хаһаайыстыба элбэх сыллаах оту ыһар былааннаах.
Сыл бүтүөр диэри бэдэрээлинэй үбү Башкортостан, Дагестан, Кабардино-Балкария, Хотугу Осетия, Краснодарскай уонна Ставропольскай кыраайдар, Брянскай, Волгоградскай, Воронежскай, Калининградскай, Новгородскай, Рязанскай, Саратовскай, Ульяновскай уобаластар ылаллара былааннанар эбит.
Сэмэн ЖЕНДРИНСКЭЙ