Саха сирин дэлэгээссийэтэ Гурьевск муниципальнай уокуругун баһылыга Сергей Подольскайы кытта көрүстэ. Бөлөх састаабыгар Чурапчы улууһуттан Светлана Захарова, Екатерина Скрябина уонна Екатерина Прокопьевна Скрябина бааллар. Дьаһал саҕаланыытыгар уокурук үлэтин, олоҕун билиһиннэрэр 2 киинэни көрдөрдүлэр. Салгыы төгүрүк остуол тула олорон, истиҥ-иһирэх кэпсэтии буолла. Дьаһалы уокурук баһылыга Сергей Подольскай иилээн — саҕалаан ыытта. Манна кыттыыны ыллылар: баһылык солбуйааччыта Людмила Казмерчук, Гурьевск оройуонун кылаабынай бырааһа, биир дойдулаахпыт, Мугудайтан төрүттээх Иван Оконешников, олохтоох дьаһалта исписэлиистэрэ, пресс-сулууспата.
Сергей Подольскай билигин дойдуга буола турар ыарахан кэмҥэ омуктар икки ардыларынааҕы аллея улахан суолталааҕын бэлиэтээтэ: «Бу аллеяҕа араас омук дьоруойдара үйэтитиллэн, норуоттар сомоҕолоһууларыгар, бары түмсүүлээх буоларбытыгар олук буолар», — диэтэ. Итини сэргэ биир дойдулаахпыт Вера Захароваҕа аналлаах дьаһалга кини төрөөбүт дойдутуттан улахан дэлэгээссийэ кэлбитэ үтүө холобур буоларын эттэ.
Саха сирэ тустууктарынан киэҥник биллэринэн, дьаһалга тустууга аан дойду чөмпүйүөнэ, Гурьевск уокуругун успуорка салалтатын салайааччыта Алексей Шемаров кытынна. Кини Саха сирэ биир сомоҕолоһуу тыыннаҕын, успуорт сайдыытыгар, ыспарсымыаннары өйөөһүҥҥэ үгүс үлэ ыытылларын чорботон бэлиэтээтэ. Саха бөҕөстөрө атын дойду аатыттан тусталларын, кинилэр кыайыыларыттан саха норуота киэн туттарын, ыспарсымыаннарын үрдүктүк чиэстииллэрин эттэ. Саха сириттэн сылдьар тустуук доҕотторугар Виктор Лебедевка, Айаал Лазаревка, Айаал Андреевка, бырааттыы Контоевтарга, СӨ успуорт миниистирэ Леонид Спиридоновка эҕэрдэтин тиэртэ.
Саха сирин дэлэгээссийэтин аатыттан Светлана Захарова Калининград куоракка олорор биир дойдулаахтарбыт түмсүүлээхтэрин бэлиэтээн туран, саха култууратын үрдүктүк тутан, землячество тэринэн, Калининград уобалаһыгар ыытыллар араас тэрээһиннэргэ көхтөөхтүк кытталларын эттэ. Маныаха Калининград уокурукка элбэх саха дьоно олорорунан, сайыҥҥы кэмҥэ элбэх киһи сынньана, эмтэнэ кэлэринэн сибээстээн сахалар түмсэллэригэр, мусталларыгар анаан сир биэрэллэригэр олохтоох дьаһалтаттан көрдөстө. Бу этиини баһылык Сергей Подольскай өйөөн, үлэлэһэргэ бэлэмин биллэрэн, дьаһал кыттыылаахтарын үөртэ.
Бу күн Калининград уобалаһын устуоруйа уонна уус-уран мусуойун дуоһуйа көрдүбүт-иһиттибит. Леонид Флегонтов эрдэ бэчээккэ тахсыбатах Вера Кирилловна сэдэх хаартыскаларынан оҥоһуллубут альбому мусуой пуондатыгар бэлэхтээтэ. Альбомҥа урукку сылларга СӨ Бырабыыталыстыбатыгар анал фотокэрэспэдьиэнинэн үлэлээбит Валерий Стефанскай түһэрбит хаартыскалара киирдилэр.
Екатерина Скрябина.