Үлэни, успуорду өрө туппут Чурапчы дьонунан-сэргэтинэн баай! Талба талаан – норуокка баар!
Олунньу 14-15 күннэригэр, Иван Кандинскай аатынан “Айыллаан” КК-гэр сылын аайы ыытыллар Чурапчы нэһилиэгин тэрилтэлэрин икки ардыларынааҕы “Чурапчы чараҥа” уус-уран көрүү-бэстибээлэ түмүктэннэ.
Барыта холбоон 11 бөлөх кыттыыны ылла. Тэрилтэ үлэһиттэрэ күннээҕи түбүктэн быыс булан бэлэмнэнэн, Улуу Кыайыы өрөгөйдөөх 80 сылыгар анаммыт бэстибээлгэ сүргэлэрэ көтөҕүллэн туран оонньоотулар.
“Умнуллубат Албан ааттар” биидьийэнэн дьүһүйүү үрдүк хаачыстыбалаахтык уһуллан кыайыыны уһансыбыт үтүөкэннээх дьоммут үйэлэргэ үйэтитилиннэ. Хас биирдии кэлэктиип устуоруйа быыһын сэгэтэн үгүһү көрдөрдүлэр-иһитиннэрдилэр. Манна даҕатан эттэххэ, сахалыы уус-уран ааҕыылары үгүс тэрилтэлэргэ эр дьон аахпыта сонун көстүүнэн буолла. Биллэр худуоһунньук Афанасий Мунхалов “Түһүлгэ” хартыынатын тиэмэтинэн үҥкүү маассабай буолан, көрөөччүлэри улаханнык сөхтөрдө, бииртэн биир дьэрэкээн көстүүмнэр көһүннүлэр. Итини таһынан тэрилтэ салайааччылара бэйэлэринэн барытыгар көхтөөх кыттыыны ылбыттарын дьүүллүүр сүбэ бэлиэтии көрдө.
“Көрүү-бэстибээлбит сылтан сыл аайы сайдан, үүнэн иһэр. Бииртэн биир сонун музыкальнай нүөмэрдэр айыллан иһэллэрэ, тэрилтэлэрбит түмсүүлэрэ бөҕөргүүр, күүһүрэр. Тэрилтэ салайааччыларыгар, профсойуус бэрэссэдээтэллэригэр, үлэһит туруу дьоммутугар улахан махталбытын тиэрдэбит”, — диэн “Чурапчы нэһилиэгэ” тыа сирин түөлбэтин дьаһалтата иһитиннэрэр.
Дьүүллүүр сүбэ састаабын билиһиннэрдэххэ: бэрэссэдээтэлинэн Семен Ноговицын, А.А. Игнатьева, П.П. Дьяконов, А.В. Ашеина, И.И. Поисеев үлэлээтилэр.
Тэрилтэлэри икки бөлөххө араараннар сыаналаатылар. Кыайыылаахтары билиһиннэрэбит:
I бөлөххө
1 миэстэ – олох-дьаһах хомунаалынай хаһаайыстыба, П.И. Борисова аатынан “Улыбка” оҕону сайыннарар киин-уһуйаан, “Маарыкчаан” ПО, “Аартык” кээпэрэтиип холбоһуктаах “Дохсун” хамаандалара;
2 миэстэ – С.А. Новгородов аатынан Чурапчы орто оскуолата, “Хатан” ХЭТ холбоһуктаах “Дархан” хамаандалара;
3 миэстэ – Д.П. Коркин аатынан Чурапчытааҕы олимпийскай эрэллэри бэлэмниир интэринээт-оскуола, “Алмазхэргиэнбанк” холбоһуктаах “Өрөгөй” хамаандалара).
II бөлөххө
1 миэстэ – П.Н. Сокольников аатынан Чурапчытааҕы киин балыыһа, оройуоннааҕы “Айылгы” НАДь-тэ, Чурапчы улууһун култуураҕа управлениета, А.А. Саввин аатынан устуоруйа уонна этнография мусуойа, Е.А. Борисов аатынан Чурапчытааҕы киин архыып-бибилэтиэкэ, урбаанньыттар түмсүүлэрэ, ЗАГС, Роспотребнадзор, “Саха” НКИХ филиала холбоһуктаах “Түмэн” хамаандалара;
2 миэстэ – улуустааҕы ветеринария управлениета, “Кэскил” уһуйаан, “Чурапчы” ТХПК, мелиорация, суут приставтар, “Дьулуур” ХЭТ, ыччаты уонна дьиэ кэргэни өйүүр психологическай киин, А.П. Гоголев аатынан муусука оскуолата, “Дорожник” ХЭТ, “Сбербанк России”, “Якутлесресурс” холбоһуктаах “Сомоҕо” хамаандалара;
3 миэстэ – Чурапчытааҕы Ис дьыала отдела, “Мичил” уһуйаан, “Сахатранснефтегаз”, айылҕа харыстабыла холбоһуктаах “Тэтим” хамаандалара.
Кыайыылаах хамаандалартан биирдии нүөмэри таланнар аныгыс сырыыга нэһилиэнньэҕэ анаан гала-кэнсиэрт буолара былааннанар.
Сэмэн ЖЕНДРИНСКЭЙ