Ыһыаҕы Дмитрий Коркин иитиллээччитэ, ССРС тустууга успуордун маастара, өрөспүүбүлүкэтээҕи оһуохайга күрэхтэр номинаннара Семен Морфунов алгыстаан аста. Выпустар бары бэлэмнэнэн, формаланан, сахалыы таҥнан, сэлэлии хааман киирдилэр.
Ыһыахпытын оскуолабыт выпускницата Мария Дьячковская, «Айан» бөлөх, «Күбэйэ» бэтэрээннэр кулууптарын салайааччыта Егор Макаров бэрт сэргэхтик, хомоҕойдук саҥаран-иҥэрэн, иилээн-саҕалаан ыыттылар. Ыспартыыбынай албан аат мусуойун научнай үлэһитэ, ол кэмнэргэ завуһунан үлэлээбит Анна Спиридонова оскуола устуоруйатыттан, оскуола тэриллиэҕиттэн үлэлээбит учуутал Вера Шадрина ахтыы оҥордулар. Ыһыах дьоно-сэргэтэ оскуолабыт бастыҥ үөрэнээччитин, выпускнигын, билигин СӨ Бырабыыталыстыбатын бэрэссэдээтэлин солбуйааччытын Георгий Степановы уруйдуу-айхаллыы көрүстүлэр.
Егор Давыдов улуус, нэһилиэк, Анастасия Осипова үөрэх салалтатын аатыттан А. П. Спиридоноваҕа, А. С. Брызгаеваҕа, А. Е. Павловаҕа, Р. С. Пономареваҕа, В. П. Шадринаҕа, Г. М. Степановка уо. д.а. наҕараадалары туттардылар.
Ыһыаҕы тэрийээччилэр эрдэттэн үлэлэһэн, учууталлартан, выпускниктартан элбэх успуонсары булары ситиһэн, бэлэх-туһах элбэҕэ астыннарда. Ол курдук, бииртэн биир күрэхтэр сып-сап ыытыллан истилэр. Уһун суһуох күрэҕэр оскуола физикаҕа, музыкаҕа учуутала Любовь Федотова тэҥнээҕин булбата. Саха таҥаһын куонкуруһугар Мугудайтан сылдьар выпускницабыт Мотрена Адамова бэйэтэ тикпит сиэдэрэй бууктаах сонноох, дьабакалаах, үтүлүктээх комплегынан кыайыан кыайда, Абрамовтар педагогическай династия анал бирииһин тутта. 2-с миэстэҕэ норуот маастара Февронья Спиридонова-Порядина бэйэтэ тикпит сахалыы таҥастарынан таҕыста, бииргэ үөрэммит дьүөгэлэрэ кэтэн көрдөрбүттэрэ кэрэхсэбиллээх буолла. 3-с миэстэҕэ выпускникпыт Георгий Степанов олоҕун аргыһынаан, доҕотторунаан арыаллатан киирэн таҕыстылар.
Салгыы күрэхтэһиилэр тэрээһиннээхтик ыытылыннылар. Халадаайдаах сүүрүүгэ Настя Евграфова иннигэр кими даҕаны түһэрбэтэ. Иккис миэстэни 78-с выпустан Тамара Павлуцкая ылан, билигин да эдэрдии эрчимнээҕин көрдөрдө. Үһүс бириистээх миэстэҕэ Настя Владимирова- Седалищева таҕыста. Эр дьоҥҥо 100 м сүүрүүгэ Михаил Егоров кыайда, киниттэн бэрт кыранан хаалан, выпускникпыт Уус Аллан улууһун Мүрү орто оскуолатын дириэктэрэ Сергей Фомин иккиһинэн таҕыста, үһүс миэстэни Дмитрий Осипов ылла.
Сымара тааһы ыраах быраҕыыга Михаил Егоров тэҥнээҕин булбата, 55 сааһыттан үөһэлэргэ Илья Пестряков 1-кы миэстэ, Семен Катакинов 2-с, Юрий Чепалов 3-с миэстэни ылары ситистилэр Мас тардыһыытыгар бэтэрээннэргэ Иван Попов тэҥнээҕин булбата. Саамай ыраахтан кэлбит выпускницабыт, норуот маастара, култуура туйгуна Татьяна Макарова, «саамай чугас дьиэлээх» Акулина Корякина анал бириис хаһаайыннарынан буоллулар. Осиповтар педагогическай династияларыттан оҕолоро, учууталбыт Анна Павлова оҕолорунаан, выпускникпыт М.Н. Матвеев харчынан сэртипикээттэрэ, выпускникпыт Георгий Степанов бирииһэ оонньонно.
Ити курдук ахтылҕан киэһэтэ Имигиттэ Эбэбит үрдүнэн хойукка дылы сатыылаата. Өссө даҕаны көрсүөхпүт, маннык тэрээһиннэр буола турдуннар дэһэн, инникигэ эрэл кыымнаах түмүктээтибит.
1983с. выпускница Надежда ЗАХАРОВА