Быйылгы сылга доруобуйаларынан хааччахтаах дьон ортолоругар бастакы күрэхтэһии – чэпчэки атлетикаҕа өрөспүүбүлүкэтээҕи чемпионат буолла.
Чемпионакка уопсайа 26 хамаанда, 176 спортсмен кытынна, бэйэлэрин икки ардыларыгар кыахтарын тургутустулар.
Биһиги улууспутуттан тириэньэр Гаврил Константинов салайар 6 киһилээх дьоҕус хамаанда ситиһиилээхтик кытынна.
Ол курдук ядро быраҕыытыгар подаҕа Хоптоҕоттон Николай Фомин 2-с миэстэҕэ тигистэ. Чурапчыттан Өрөспүүбүлүкэ чемпионката Вера Климова бириистээх 3-с миэстэни ылла. Истибэттэр ортолоругар сүүрүүгэ Төлөйтөн Мария Капрынова 800 миэтэрэ уһуҥҥа тэҥнээҕин булбата, оттон 400 миэтэрэҕэ үһүс миэстэни ылан кыайыыга дьулуурун көрдөрдө.
Хоптоҕоттон спорт бэтэрээнэ Максим Монастырев подаҕа 400 миэтэрэҕэ 3-с бириистээх миэстэҕэ тахсан, саалаҕа олорооччулар, дохсун ытыс тыаһынан үөрүүтүн үллэстэн, истиҥник эҕэрдэлээтилэр.
Быйыл улахан дьон спордугар саҥа үктэммит эдэр кэскиллээх спортсменкабыт Мичийэ Павлова 60 м сүүрүүгэ 3-с, ядро быраҕыытыгар1-кы миэстэни ылан бастакы хардыытын ситиһиилээхтик саҕалаата. Кинини тириэньэрэ Егор Куприянов эрчийэр.
Быйылгы сыл уратытынан улууспутуттан оскуола саастаах 6 оҕо бастакыларын өрөспүүбүлүкэтээҕи чемпионакка күрэхтэһэн, өрөспүүбүлүкэтээҕи спартакиада зачетугар киирдилэр.
Сыл устата чэпчэки атлетикаҕа үгүс күрэхтэр ыытыллыахтара, онон бу тэтиммитин ыһыктыбакка, хамаандабытыгар спортсмен ахсаанын хаҥатыыга үлэни тэрийэр сорук турар.
Иннокентий Матвеев.