Кулун тутар 5 күнүгэр “Айылгы” киэҥ уораҕайыгар биллэр чабырҕахсыт, ССРС култууратын туйгуна, РСФСР култууратын үтүөлээх үлэһитэ Мария Герасимова-Сэҥээрэ аатынан “Чараас сытыы тыллаах чабырҕахпыт чаҥыйдын” үгэскэ кубулуйбут чабырҕахсыттар өрөспүүбүлүкэтээҕи аһаҕас күөн күрэстэрэ IX-с төгүлүн ыытылынна.
Күрэскэ Мэҥэ Хаҥалас, Таатта, Амма, Чурапчы улуустарыттан оскуола оҕолоро, улахан дьон биирдиилээн уонна бөлөҕүнэн арахсан кытыннылар. Дьүүллүүр сүбэ бэрэссэдээтэлинэн Мария Герасимова-Сэҥээрэ бэйэтэ үлэлээтэ. Кини этэринэн, бу күрэс төрөөбүт төрүт тылбыт сүөгэйин, сүмэтин симэлийбэт, сүппэт үйэлииргэ, кэнчээри ыччаппытыгар иҥэрэргэ, тиэрдэргэ, саҥа талааннары арыйарга, үгүс дьон кэккэтигэр чабырҕах курдук уустук фольклор көрүҥүн тарҕатарга туһуланар.
Тыҥааһыннаах күөн күрэс кэннэ түмүккэ улахан дьоҥҥо кылаан бирииһи «Билбит-көрбүт» Мэҥэ -Хаҥалас Наахара нэһилиэгин Тиэлигититтэн Валентина Трофимова бөлөҕө ылла. 1 м- Болтоҥоттон “Утум” бөлөх (салайааччы Александра Максимова), 2 м –Амма Соморсунуттан «Чаҕаарыый далбардар» бөлөх (салайааччы Туйаара Белолюбская), 3 м «Кытаанах кыайардара” буоллулар.
Мэҥэ Хаҥалас Балыктааҕыттан «Ай-тыас» бөлөх (салайааччы Дария Андросова) уонна Мындаҕаайыттан «Чоргуй» бөлөх (салайааччы Матрена Фомина)биһирэбили ылыллар.
Улахан дьоҥҥо 1 м.-Кытаанахтан Любовь Монгуш, 2 м.- Тааттаттан Александр Багардыров, 3 м-Кытаанахтан СусаннаЛазарева буоллулар итиэннэ Болтоҥоттон Александра Максимова, Арыылаахтан Нюргуяна Протодьяконова биһирэбилинэн бэлиэтэннилэр.
Оскуола оҕолоругар Кылаан бириис хаһаайкатынан Чакыр нэһилиэгиттэн кыттыбыт С.К.Макаров аатынан Чурапчытааҕы гимназия 11-с кылааһын үөрэнээччитэ Аня Макарова ааттанан 20.000 солк.сертификатынан наҕараадаланна. Д.Д.Красильников аатынан Мугудай орто оскуолатын 10-с кылааһын үөрэнээччитэ Күннэй Смирникова 1 м, Г.П.Башарин аатынан Сылаҥ орто оскуолатын үөрэнээччитэ Милана Нерлова 2 м, В.Яковлев-Далан аатынан Кытаанах орто оскуолатын үөрэнээччитэ Ванесса Борисова 3 м буолары ситистилэр. Оҕолорго бөлөҕүнэн 1 м –Мэҥэ Хаҥалас Бүтэйдээҕиттэн олус диэн үчүгэйдик бэлэмнэнэн кэлбит Ньургуйаана,Афанасий Прокофьевтар дьиэ кэргэн оҕолорунаан Сережалыын,Динаралыын, Аделиналыын,2 м. — Тааттатааҕы Ф.С.Аргунов аатынан оҕо ускуустубатын оскуолатын иитиллээччилэрэ(сал.Сахаяна Колодезникова) уонна 3 м. – Чурапчы орто оскуолатын 3 “а” кылааһын үөрэнээччилэрэ буоллулар.
Кытаанахтан чабырҕахсыт, үгүс күөн күрэс кыттыылааҕа, “Чараас сытыы тыллаах чабырҕахпыт чаҥыйдын” күөн күрэскэ хаһыс да төгүллээн кыттар Любовь Монгуш: “Инники сылларга “Оторой-моторой” диэн улахан бөлөҕүнэн кэлэр эбит буоллахпытына быйыл иккис бөлөхпүн кытары иккис төгүлүн кытта кэллибит, Мария Герасимова-Сэҥээрэ суруйбут “Сахам оонньуулара” диэн чабырҕаҕынан киирдибит. Биирдиилээн толоруу түһүмэҕэр Ванесса Борисова эмиэ Мария Андреевна суруйбут “Куттас оҕо” диэн чабырҕаҕынан киирдэ. Былырыын номинация хаһаайыттара буолбуппут. Бэйэм эмиэ биирдиилээн уонна бөлөҕүнэн түһүмэххэ кытынным. Инникитин даҕаны чабырҕахпыт сайда, тэнийэ, чабырҕаҕынан утумнаахтык дьарыктанар дьон элбии турдунар”,-диэн кылгастык билиһиннэрдэ, баҕа санаатын тиэртэ.
Чахчы даҕаны “Чараас сытыы тыллаах чабырҕахпыт чаҥыйдын” үгэс буолбут күөн күрэс симэлийбэккэ, уостубакка өссө даҕаны кэҥии, сайда, тэнийэ турарыгар, чабырҕахтыыр дьон-сэргэ, оҕо аймах сыллата үксээн иһэригэр эрэнэбит. М.А.Герасимоваҕа-Сэҥээрэҕэ бу кэскиллээх дьыалатыгар ситиһиилэри, элбэх саҥа талааннар тахса туралларыгар үтүө баҕабытын тиэрдэбит!
Наталья Сибирякова