Чакыр нэһилиэгэр 5 уонна 3 квартиралаах икки саҥа дьиэ олоххо киирдэ. Дьиэ аһыллыытын үөрүүлээх чааһыгар СӨ Тутуу миниистирин солбуйааччыта Евгений Афанасьев, улуус баһылыга Степан Саргыдаев эҕэрдэ тылы эттилэр, аалай кыһыл лиэнтэни быстылар. Дьиэҕэ киирии бастакы алгыһын Сэмэн Морфунов ыытта.
Дьиэлэр «Хаарбах туруктаах дьиэттэн көһөрүү» бырагырааманан тутулуннулар. Тутууну чакырдар бэйэлэрин уоллара Афанасий Матвеев салайааччылаах «Востокстрой» ХЭТ бэс ыйыттан саҕалаан тутан, үлэҕэ киллэрдэ.
Аҕыс квартираҕа эдэр исписэлиистэр киирэн, үөрүүлэрэ үгүс.
«Урут учууталлары үлэҕэ ыҥырарбар, дьиэ-уот, усулуобуйа суоҕуттан санаарҕыыр, ыарахаттары көрсөр эбит буоллахпына, мантан иньэ кыбыстыыта суох, бары усулуобуйа баар диэн ыҥырарбыттан үөрдүм», — диэн оскуола дириэктэрэ Александра Неустроева санаатын үллэстэр.
«Биһиги ыал үөрэхпитин бүтэрээт, биэс сыл аннараа өттүгэр иккиэн учууталлыы кэлбиппит. Биир оҕолоохпут. Бүгүн саҥа дьиэҕэ киирэн, улаханнык үөрдүбүт. Маннык бырагыраама баар буолан, дьиэлэр тутуллан, эдэр исписэлиистэр үлэлии кэлэллэригэр усулуобуйа тэриллэрэ олус үчүгэй. Чакыры наһаа сөбүлээтибит, аны саҥа оскуола тутуллара буоллар, өссө да нэһилиэк сайдарыгар үлэлиэхпит-хамсыахпыт этэ», — диэн Варвара уонна Руслан Ивановтар этэллэр.
Елена Макаринская