Оччолорго сүүрбэтин эрэ ааспыт эдэркээн Дуня Дьокуускайдааҕы култуурунай-сырдатар училищены бүтэрэн Мугудайга ананан үлэлии кэлэн баран 1975 сыллаахха оройуон чөмпүйүөн тырахтарыыһын, туруу үлэһит Ылдьаа уолу кытары билсиһиилэрэ саҕаламмыта.
Төһө да ыарахан күннэр турдаллар, эдэр сүрэхтэр олоххо тардыһыыларын туох тохторуой?! Илья үгүс кыргыттартан сэмэй, килбит Евдокияны талбыта. Тапталларын тылынан этиспэтэллэр да, сүрэхтэригэр кини кыыма саҕыллыбытын уонна сириэдийэн иһэрин хайалара даҕаны күн бүгүнүгэр диэри мэлдьэһэр кыаҕа суох. Инньэ гынан эдэрдэр 1975 сыллаахха муус устар 4 күнүгэр сүбэлэрин холбоон уруу тэрийбиттэрэ. Эдэр ыал утуу-субуу оҕолонон испиттэрэ. Ас-таҥас чычырбас кэмигэр Евдокия Федоровна оҕолоннум диэн олорбокко, уоппуската суох үлэ үөһүгэр сылдьыбыта. Кини билигин “Чурапчы” литэрэтииринэй түмсүү чилиэнэ, Мугудай нэһилиэгэр “Илгэ” литэрэтииринэй уопсастыбаннай түмсүү салайааччыта, волейбол успуордун бэтэрээнэ. Олоҕун тухары ити курдук дьүккүөрдээхтик, дьоҥҥо-сэргэҕэ хайҕатардык үлэлээһин киһи ахсын тиксибэт, киһи эрэ кыайбат суола. Ити курдук Дьячковскайдар дьоллорун үлэттэн булан, оҕолорун барыларын үөрэттэрэн, сүөһүлэнэн-астанан ыал киэнэ мааныта, бастыҥа буолан Маралаайы бөһүөлэгэр олордулар. Улахан уоллара Владислав билигин Дьокуускай куоракка Ис дьыала уорганнарыгар суоппарынан үлэлиир, кэргэннээх икки оҕолоох. Иккис уол Илья Мугудай нэһилиэгин олохтооҕо, бааһынай хаһаайыстыба баһылыга, кэргэннээх, үс оҕолоох. Кыра уол Николай, Хатылы нэһилиэгэр олорор, урбаанньыт, кэргэннээх, икки оҕолоох.
Илья Ильич төһө да 74 саастаннар, быар куустан олорбот оҕолоругар көмөлөһөн оттуур-мастыыр. Евдокиятыныын дьиэ ис-тас үлэтиттэн араарбакка түбүгүрэллэр.
Бүгүн, муус устар 13 күнүгэр, Илья Ильич уонна Евдокия Федоровна биир олорбуттара лоп курдук 50 сыла туолуутун сэлиэнньэ олохтоохторо, улуус дьаһалтатыттан дьиэ кэргэн бэлиитикэтин сүрүннүүр исписэлииһэ Татьяна Бушкова, “Мугудай нэһилиэгэр” тыа сирин түөлбэтин баһылыга Николай Аммосов чуолаан улуустааҕы “Ыал саргыта” пилотнай бырайыак чэрчитинэн, оройуоннааҕы ЗАГС үлэһитэ Анастасия Афанасьева үөрэн-көтөн тураннар эҕэрдэлээтилэр, улуус дьаһалтатын аатыттан 50 тыһыынча сууммалаах сэртэпикээти туттардылар итиэннэ ЗАГС “Ытык олох кинигэтигэр” киллэрдилэр.
Үйэ аҥара дьоллоохтук-соргулаахтык ыал буолан олоруу, дьон-сэргэ билиниитин ылыы чахчы да киһи эрэ үөрэ истэр суола. Эдэр ыччаттарга ол холобур буолуохтун!
Сэмэн ЖЕНДРИНСКЭЙ