Кулун тутар 15-17 күннэригэр Дойду Бэрэсидьиэнин талар быыбар ыытыллаары турар. Бу быыбарга бэлэмнэнии кэмигэр «Информ УИК» диэн бырайыагынан, учаастактааҕы быыбардыыр хамыыһыйалар чилиэннэрэ дьиэлэри кэрийэ сылдьан үлэлиэхтэрэ. Манна улууспутугар уопсайа 86 киһи хабыллан үлэлиирэ былааннанар.
Быыбардыыр хамыыһыйалар чилиэннэрэ биирдиилээн, аадырыстарынан сылдьан быыбардааччыларга сырдатыы үлэтин ыытыахтара. Кинилэр сыаллара — соруктара — быыбардааччыларга ханнык быыбар буоларын, хайдах, ханна куоластыахха сөбүн, хандьыдааттар тустарынан иһитиннэрии буолар. Ону таһынан быыбардааччы испииһэгин чуолкайдыыр, кылгас ыйытык толорторор.
Маннык үлэҕэ эрдэ үлэлээбит, уопуттаах дьон үлэлиэхтэрэ. Ааспыт ыйга РФ бырагырааматынан үөрэнэн тургутугу ааспыттара, онон сэминээргэ эбии үөрэнэн, бэйэ-бэйэлэриттэн уопут атастаһан, ыйыы — кэрдии ылан бардылар. Бу үлэ олунньу 17 күнүттэн саҕаланыаҕа.
Түгэнинэн туһанан, Чурапчы улууһун быыбардааччыларыгар учаастактааҕы быыбардыыр хамыыһыйаҕыт чилиэннэрин үөрэ-көтө көрсүҥ диэн этиэм этэ, Кинилэр эһиэхэ анаан буолаары турар быыбар туһунан сырдатыы үлэтин ыытыахтара.
Дария Никитина