Саха сиригэр быыбар хампаанньата саҕаламмыта быданнаата. Чурапчы улууһунааҕы быыбар хамыыһыйатын эппиэттиир сэкирэтээрэ Виктория Деллохова-Никитина иһитиннэрбитинэн, балаҕан ыйын 8 күнүгэр (биир күннээх) Соловьев, Хайахсыт уонна Чурапчы нэһилиэгин быыбардааччылара баһылыктарын, дьокутааттарын талыахтара.
“Быйыл улуус иһинээҕи быыбар буоларынан сибээстээн, убаастанар биричиинэлээх быыбардааччылар быыбар буолуон уон хонук иннинэ эрдэ куоластыахтарын сөп. От ыйын 1 күнүнээҕи көрдөрүүнэн, Чурапчы улууһун үрдүнэн куоластыыр киһи ахсаана 15075 киһи, аҥардас Чурапчы нэһилиэгэр 6987 быыбардааччы бэлиэтэннэ. Соловьев нэһилиэгэр – 410 киһи оттон Хайахсыт нэһилиэгэр – 395 быыбардааччы олорор. Чурапчы уонна Соловьев нэһилиэктэригэр иккилии онтон Хайахсыт нэһилиэгэр үс хандьыдаат, итиэннэ 11 мандаакка 13 дьокутаакка хандьыдааттар регистрацияны аастылар”, — диэн Виктория Семеновна кэпсээтэ.
Уһата-кэҥэтэ барбакка кимнээх хандьыдаатынан турбуттарын билиһиннэрэбит.
Чурапчы нэһилиэгэ
“Биир ньыгыл Арассыыйа” баартыйатын чилиэнэ Владимир Дмитриевич Сивцев, 06.04.1970 сыллааҕы төрүөх, төрөөбүт сирэ Чурапчы нэһилиэгэ.Үрдүк үөрэхтээх инженер-электрик. Чурапчы нэһилиэгин баһылыгынан үлэлээн кэллэ.
Семен Семенович Игнатьев 01.03.1994 сыллааҕы төрүөх, төрдө Мындаҕаайы. Ойуур дьыалтыгар үрдүк үөрэхтээх. Чурапчы нэһилиэгин дьаһалтатыгар инженер-землеустроителинэн үлэлээн кэллэ.
Соловьев нэһилиэгэ
“Биир ньыгыл Арассыыйа” баартыйатын чилиэнэ Лена Дмитриевна Павлова 18.01.1978 сыллааҕы төрүөх, төрөөбүт сирэ Мырыла. Үрдүк үөрэхтээх филолог. Таатта улууһун Дайа-Амма нэһилиэгин Х.И. Кашкин аатынан Дайа-Амматааҕы орто оскуола дириэктэринэн үлэлээн кэллэ.
Виктор Иванович Собакин, 27.07.1973 сыллааҕы төрүөх, төрөөбүт сирэ Мырыла. Үрдүк үөрэхтэхтээх физкултуура учуутала. Соловьев нэһилиэгин баһылыгын эбээһинэһин толорооччунан үлэлээн кэллэ.
Хайахсыт нэһилиэгэ
Тарас Лукич Тарасов, 14.05.1956 сыллааҕы төрүөх, төрөөбүт сирэ Хайахсыт. Социальнай-култуурунай хайысхаҕа үрдүк үөрэхтээх. Хайахсыт нэһилиэгин баһылыгынан үлэлээн кэллэ.
Василий Ильич Борисов, 16.12.1970 сыллааҕы төрүөх, төрөөбүт сирэ Хайахсыт. Үрдүк үөрэхтээх зооинженер. Хайахсыт нэһилиэгин баһылыгын солбуйааччынан үлэлээн кэллэ.
“Биир ньыгыл Арассыыйа” баартыйа чилиэнэ Константин Константинович Аржаков 5.01.1989 сыллааҕы төрүөх, төрөөбүт сирэ Хайахсыт. Экономика уонна бухгалтерскай учуот орто анал үөрэхтээх. Чурапчы улууһун дьаһалтатыгар тыа хаһаайыстыбатын начаалынньыгын солбуйан кэллэ.
Кинилэри сэргэ, Хайахсыт нэһилиэгин дьокутаакка хандьыдааттарынан Лилия Лыткина, Семен Андреев, Виктория Тимофеева, Иван Винокуров, Геннадий Монастырев, Дария Филиппова, Анна Романова, Михаил Поисеев, Игнатий Каженкин, Арина Шишигина, Игорь Лазарев, Дария Бродникова, Ксения Петрова туруннулар.
Сэмэн Жендринскэй