Бүгүн кулун тутар 7 күнүгэр, оройуоннааҕы “Айылгы” НАДь-гэр, Чурапчы улууһун дьаһалтата, кэлэн иһэр сааскы бырааһынньыгы көрсө кэрэ аҥаардары сибэкки дьөрбөтүн утары уунан эҕэрдэлээтэ. Улуус салайар аппараатыгар олорор эр дьоммут истиҥник эҕэрдэлээн клбит ыалдьыттары дохсун ытыс тыаһынан көрүстүлэр.
Үөрүүлээх чааска нэһилиэк “Чурапчы улууһа” МО баһылыга Степан Саргыдаев, улуус дьокутааттарын Сэбиэтин бэрэссэдээтэлин солбуйааччы Юрий Посельскай эҕэрдэ тылы эттилэр. Чурапчы улууһун дьахталларын Сүбэтин бэрэссэдээтэлэ Анастасия Афанасьева түмсүү чилиэттэрин кытары тахсаннар хомоҕой хоһооннорунан, тойугунан эҕэрдэлээтилэр. Дьоро тэрээһини “Айылгы” НАДь-тин исписэлиистэрэ Айталина Анисимова уонна Олесь Максимов иилээн-саҕалаан ыыттылар.
Наҕараадалааһын сиэригэр-туомугар, СӨ дьахталларын уопсастыбаннай тэриллиилэрин Сойууһун Бочуоттаах грамотата Чурапчы нэһилиэгин “Чурапчыына” дьахталлар Сэбиэттэрин бэрэссэдээтэлигэр Дария Ефремоваҕа, Болтоҥо нэһилиэгиттэн Ксения Ксенофонтоваҕа, “Улуу иннигэр үтүөлэрин иһин” 2-с истиэпэннээх бэлиэнэн Хатылы нэһилиэгиттэн Варвара Федороваҕа, Чурапчы улууһун Бочуотунай грамотата Төлөй нэһилиэгиттэн Снежана Поповаҕа, улуус баһылыгын махтал суруга Бахсы нэһилиэгиттэн Евдокия Аммосоваҕа, оройуон дьокутааттарын Сэбиэтин бочуотунай грамотата Хоптоҕо нэһилиэгиттэн Валентина Петроваҕа, Хайахсыт нэһилиэгиттэн Ксения Петроваҕа, Чурапчы нэһилиэгиттэн Алена Саргыдаеваҕа туттарылыннылар.
Кэлбит ыалдьыттары аҥардас сибэкки дьөрбөтүнэн эрэ буолбакка, улуус эр дьонун аатыттан “Туймаада” Судаарыстыбаннай вокальнай эр дьон ансаамбылын кэнсиэрдин көрөн-сэргээн, бука бары үөрэ-көтө дьиэлэригэр тарҕастылар.
Сэмэн ЖЕНДРИНСКЭЙ. Ааптар хаартыскаҕа түһэриитэ