Улуус дьаһалтатыгар Медицинскэй колледж Чурапчытааҕы салаатын устудьуоннарыгар Билии күнүнэн үөрүүлээх линейка буолла.
Ааспыт сылга Чурапчытааҕы киин балыыһа, Дьокуускайдааҕы медицинскэй колледж уонна Чурапчытааҕы аграрнай-техническай колледж үс өрүттээх сөбүлэҥи түһэрсэн, улууска медик идэтигэр үөрэтэр салаа аһыллыбыта. Салайааччынан Александра Седалищева ананан үлэлиир.
Кини быйылгы үөрэх дьылыгар хас устудьуон киирбитин итиэннэ саҥа уларыйыылар тустарынан билиһиннэрдэ:
Ааспыт үөрэх дьылыгар сиэстэрэ идэтигэр 15, биэлсэргэ 13 устудьуон бастакы куурустарын ситиһиилээхтик түмүктээбиттэрэ, производственнай практикаларын киин балыыһа баазатыгар ааспыттара. Устудьуоннар сыл устата араас куонкурустарга, научнай-практическай кэмпириэнсийэлэргэ кыттан, номнуо өрөспүүбүлүкэтээҕи, регионнааҕы таһымнаах күрэхтэһиилэргэ ситиһиилэрдээхтэр. Дьокуускайдааҕы медицинскэй колледж ыытар дьаһалларыгар барытыгар көхтөөхтүк кытталлар.
Бастакы куурус устудьуоннара
Саҥа үөрэх дьылыгар 25 миэстэлээх биэлсэр группата аһылынна. Балыыһаҕа медсиэстэрэ штатынан хааччыллыы 99,6%, ол иһин сиэстэрэ идэтигэр быйыл устудьуоннары ылбатыбыт. Үөрэх болдьоҕо быйылгыттан кыччаан, биэлсэрдэр 2 сыл 10 ый үөрэнэр буоллулар. Онон 2 сыл 10 ыйынан Чурапчы улууһа 15 медсиэстэрэ, 38 биэлсэр штатынан хааччыллыахтаах. Ол курдук, 2023-2024 үөрэх дьылыгар уопсайа 53 устудьуон үөрэниэҕэ. Устудьуоннар истэригэр ыаллыы сытар Таатта, Мэҥэ Хаҥалас улуустарыттан кэлэн үөрэнэллэр. Үгүс устудьуон киин балыыһаҕа младшай медицинскэй сиэстэрэнэн үлэлииллэр. Биһиги үөрэхпит кыһатыгар бары дьиэ кэргэннээх, оҕолордоох устудьуоннар үөрэнэ сылдьаллар. Кинилэр дьиэлэриттэн тэйбэккэ үөрэнэллэригэр табыгастаах усулуобуйа тэрилиннэ диэн сыаналыыбын. Үөрэтэр састаап толору – Киин балыыһа быраастара, биэлсэрдэр, үрдүк үөрэхтээх сиэстэрэлэр уонна Чурапчытааҕы аграрнай-техническэй колледж преподавателлэрэ үөрэтэллэр. Улуус баһылыга Степан Саргыдаев өйөөн, устудьуоннар үөрэнэллэригэр, чуолаан араас процедураны, бастакы суһал көмөнү оҥороллоругар анаан муляжтары ылбыппыт. Онон сатабыллаах, идэлэрин толору баһылаабыт медиктэр үүнэн тахсыахтара диэн эрэнэбит.
Бу күн устудьуоннары, үлэһиттэри улуус баһылыгын социальнай боппуруостарын солбуйааччы Мария Кронникова, Чурапчытааҕы киин балыыһа кылаабынай бырааһа Николай Сивцев саҥа үөрэх дьыла саҕаламмытынан эҕэрдэлээтилэр, ситиһиилээх үөрэҕи баҕардылар.
Марфа ПЕТРОВА.