Чурапчы улууһун төрөппүттэрэ сайабылыанньаны “Госуслуги” порталынан ыытыахтарын сөп диэн Чурапчытааҕы үөрэх управлениетын салалтата иһитиннэрэр.
Порталга киирэн сайабылыанньаны толоруу хайаан даҕаны ирдэниллэр. Манна ийэ эбэтэр аҕа пааспара, оҕо төрөөбүтүн туоһулуур сибидиэтэлистибэ уонна регистрация туһунан ыспыраапка наада. Толорбут сайабылыанньаҕытын тус кабинеккытыгар хаалларыаххытын сөп.
Өскөтүн “Госуслуги” порталын сатаан туһаммат эбэтэр туох эмэ биричиинэн кыайан киирбэккэ, паролгутун умнубут түгэҥҥитигэр “Мои документы” элбэх өҥөнү оҥорор кииҥҥэ тиийиэххитин сөп. “Биһиги кииммит дьоҥҥо-сэргэҕэ тустаах өҥөнү оҥорууга аана мэлдьи аһаҕас. Төрөппүттэр туһааннаах докумуоннарын бэйэлэрин кытары илдьэ кэлэннэр биһиги исписэлиистэрбит нөҥүө кыһалҕаларын тута быһааттарыахтарын сөп, үөрэ көрсүөхпүт”, — диэн “Мои документы” Чурапчытааҕы отделениетын начаалынньыга Матрена Сивцева сүбэлиир.
Ирдэбил быһыытынан маҥнайгы кылааска ылыы икки түһүмэҕинэн ыытыллыаҕа:
Бастакы түһүмэх муус устар 1 күнүттэн бэс ыйын 30 күнүгэр диэри буолуоҕа. Манна оҕолор бастакы уочарат бырааптаахтары уонна олорор сирдэринэн оскуолаҕа киирэллэригэр ананар.
Иккис түһүмэх от ыйын 6 күнүттэн балаҕан ыйын 5 күнүгэр диэри буолуоҕа. Манна сыһыарыллыбыт сиргэ прописката суох оҕолор уонна ханнык баҕарар атын оскуолаларга төрөппүттэр сайабылыанньа биэриэхтэрин сөп.
Ордук сиһилии Чурапчытааҕы үөрэх управлениетын саайтыгар билсиэххэ сөп.
Сэмэн Жендринскэй