Бүгүн о.э ахсынньы 24 күнүгэр, дьоллоох Дьокуускай куоракка «Өрөгөй» успуорт уораҕайыгар эһиилги “Дыгын оонньууларыгар” сүүмэрдиир бастакы түһүмэх саҕаланар.
Бу түһүмэххэ барыта холбоон 58 ыспарсымыан суруттарда, ол иһигэр ааспыт сыллар чөмпүйүөннэрэ Леонид Филиппов, Алексей Уваровскай уонна Вячеслав Дьяконов бааллар диэн Дьулустаан Сергеев иһитиннэрэр.
Чөмпүйүөннэри сэргэ ааттаах-суоллаах многоборецтар — Николай Матаннанов, Айсен Ботуев, Артём Дьяконов, Яков Дмитриев, Борис Сдвижков, Тимофей Большаков, Павел Друзьянов, Алексей Соколов, Айсен Семенов, Владимир Шологонов, Алексей Созонов кыттыахтара. Санатан эттэххэ, быйылгы чөмпүйүөн Дьулустан Ноговицын эрэ эһиилги оонньууларга кыттар путевкалаах.
Бүгүн сахалыы ыстаҥа, тутум эргиирэ, мас тардыһыытын көрүҥнэрэ ыытыллыахтара. Оттон сарсын, ахсынньы 25 күнүгэр, оҕунан ытыы, 400 миэтэрэҕэ сүүрүү, хапсаҕай уонна ыараханы көтөҕүү буолуоҕа.
Сэмэн ЖЕНДРИНСКЭЙ