Үтүө санаалаах киһи диэн кимий? Биһиги санаабытыгар, оҥорбут үтүө дьыалатыгар кимтэн да тугу да эрэйбэккэ, дьоҥҥо куттуун-сүрдүүн тардыһан, кинилэргэ үтүөнү, ырааһы эрэ саҕар, ураты эйгэлээх киһини ааттыахпытын сөп. Үтүө санаа — мээнэ дьоҥҥо бэриллибэт…

Бэҕэһээ ол оннук сэдэх көстүү, Даниил Барашков аатынан Бахсы орто оскуолатыгар көстөн ааста.

“Биһиги нэһилиэкпит биир ытыктанар Илья Ильич уонна Ульяна Павловна Гоголевтар төрөппүт уоллара, билигин уоппускатыгар кэлэ сылдьар анал байыаннай дьайыы кыттыылааҕа Виталий Ильич оскуолабыт үөрэнээччилэригэр анаан, соһуччу 200 тыһыынча сууммалаах, оҕолор эт-хаан өттүнэн сайдалларыгар анаан харчынан көмөнү оҥордо.

Оскуолабыт кэлэктиибин, үөрэнээччилэрин, төрөппүттэрин, Бахсы нэһилиэгин бары олохтоохторун ааттарыттан улахан махталбытын тиэрдэбит, кининэн киэн туттарбытын биллэрэбит! Уолбутугар Виталийга бары үтүөнү, кытаанах доруобуйаны баҕарабыт”, — диэн оскуола дириэктэрэ Алина Аркадьевна Гоголева эттэ.

Анал байыаннай дьайыы байыаһа Виталий Гоголев бэйэтин кэмигэр, 1989-1990 сылларга начаалынай кылааска Николай Андреевич Попов салалтынан үөрэммитэ. Онтон бэҕэһээ оскуола ыспартыыбынай саалатын көрөн баран эбии үөрэнэр инбэнтээр ылыналларыгар анаан тустаах көмөнү оҥордо.

 

Сэмэн ЖЕНДРИНСКЭЙ