Болтоҥо нэһилиэгэ элбэх көмүс хатырыктааҕынан баай күөллэрдээх. Дьону-сэргэни муҥхалатыыны иилиир-саҕалыыр, салайар дьонноох. Кэлин кэмҥэ бу нэһилиэк дьонун, кэлбит ыалдьыттары түмэн муҥхалатыыны Чурапчы улууһун, Болтоҥо нэһилиэгин Бочуоттаах гражданина Николай Яковлевич Местников салайбыта. Чуораайытта Эбэ уунан толоруллуоҕуттан сыыйа балык үөскээн, нэһилиэк сүрүн муҥхалыыр күөлэ буолбута.
Сэтинньи 14 күнүгэр бу Эбэҕэ муҥха буолла. Дмитрий Местников уонна Яков Кривошапкин салайдылар. Дмитрий- Николай Яковлевич уола. Олохтоох дьаһалта дьоннорун-сэргэлэрин муҥхалааһыҥҥа түмүүгэ эрдэттэн биллэрии таһаарбыттара. Биир дойдулаахтара, улуустааҕы гимназия дириэктэрэ Юрий Слепцов автобуһунан хааччыйда.
Бу сырыыга сүрүн муҥхаһыттарынан олохтоох оскуола үрдүкү кылааһын уолаттара, эр дьонноро буоллулар. Уолаттары төрөппүт кэмитиэтин бэрэссэдээтэлэ Саргылана Оконешникова салайан илдьэ сырытта. Олус үчүгэйдик тэринэн кэлбиттэр. Эбиэт буһарынан сылаас чэйинэн, миининэн күндүлээтилэр.
Муҥха сырыыта табылынна, ханна да иҥнибэккэ кэллэ, чардаакка тахсыытыгар ийэтэ балыгынан өрө бырылыы түстэ. Бэрт бэрээдэктээхтик куулланан холкутук үллэһиннибит. Анньыыһыттарга, бэчимэ тардааччыларга, нырыыһыттарга тус туһунан өлүүлээтилэр. Биһиги, нырыыһыттар, балтараалыы куул өлүүлэннибит.
Көмүс хатырыктааҕынан өлгөмнүк өлүүлээбит Эбэбитигэр, муҥха салайааччыларыгар, тэрийээччилэргэ барҕа махталбытын тиэрдэбит.
Алексей Слепцов.
Григорий Турантаев хаартыскалара