Болтоҥолор Бэрэсидьиэн гранын кыайыылааҕынан таҕыстылар

Болтоҥо нэһилиэгэ үлэлиир “Утум” СО НКО быйылгы дьылга маҥнайгытын ыытыллыбыт Бэрэсидьиэн пуондатын граныгар кытынна. Чурапчы улууһуттан соҕотоҕун кыайыылаах тахсан 935 тыһыынча 571 солкуобай 52 харчыны ылар буолла. Инньэ гынан бырайыак уопсай сууммата 1 мөлүйүөн 451 тыһыынча 888 солкуобай 52 харчыга тахсыста.

“Үс кут” экодухуобунай эйгэ диэн ааттаах бырайыак ааптарынан СӨ ыччат бэлиитикэтин туйгуна Диана Павлова, салайааччынан Сардана Егорова  онтон бырайыак хамаандатынан Николай Субуруускай аатынан  Болтоҥо орто оскуолата буолаллар.

Бу бырайыак сүрүннээн ыччат тулалыыр эйгэҕэ харыстабыллаахтык сыһыаннаһарыгар итиэннэ төрөөбүт кыраайы, Саха норуотун төрүт үгэстэрин үөрэтиигэ туһуланыаҕа. Манна сыһыаран эттэххэ, “Үс кут” экодухуобунай эйгэ тиэмэтигэр аналлаах кэмиттэн-кэмигэр, олус интэриэһинэй, саҥалыы тииптээх маастар-кылаастар тэриллиэхтэрэ уонна Саха норуотун олоҕун-дьаһаҕын, төрүт култууратын көрдөрөргө анаммыт подкаст публикациялар быыһа суох тахсаллара былааннанар.

 

Сэмэн ЖЕНДРИНСКЭЙ