Болтоҥолор баһылыкка араас хабааннаах ыйытыылары биэрдилэр


Отчуокка 70-тан тахса киһи сырытта. Сүрүн дакылаат кэнниттэн олохтоохтор бары хайысхаларга интэриэһиргиир, кыһалҕалаах боппуруостарын биэрэн, сөптөөх хоруйдарын иһиттилэр. Үгүс боппуруос тыа хаһаайыстыбатыгар, доруобуйа харыстабылыгар, социальнай хайысхаларга, суол оҥоһуутугар киирдэ.

Тыл эппиттэртэн Константин Кривошапкин, Виктор Платонов табаны иитээччилэргэ хамнас төлөнөрүн курдук ынах-сүөһүнү көрөөччүлэр эмиэ хамнастаналларын туһугар үлэни-хамнаһы ыытыахха диэн туруорустулар.

Оскуола дириэктэрэ Владислав Скрябин:

«Мастарыскыайбыт тутуутун үлэтэ бара турар, бу күһүн үөрэх дьылын саҕаланыыта олоххо киириэ. Уопсай иэнэ — 156 кв.м. Онуоха ититиитин киллэрэрбитигэр «Дьулуур» ХЭТ 400-тэн тахса тыһ этэн турар.

Маны таһынан биһиэхэ Чурапчыттан 10 оҕо үөрэнэр. Газель массыынабыт оҕолору күннэтэ таһарыгар 25 л уматыгы барыыр. Сылга 360 тыһ солк бэйэбит үппүтүттэн уйунан олоробут. Бу икки боппуруоска күүс-көмө буоларгытыгар эрэнэбин”, — диэтэ.

Баһылык Сергей Ефремов олохтоохтор ааттарыттан быһыт тутуутун уонна Семен Андреевич Новгородовка анаммыт пааматынньыгы оҥорууга улуус дьаһалтата өйөбүл-тирэх буолалларыгар эттэ.

Түмүккэ улуус баһылыга Степан Саргыдаев быйыл болтоҥолор үүтү туттарыыга 210% толорон, былааны аһара куоһарбыттарын этэн туран, астынарын биллэрдэ, олохтоохторго махтанна.

Елена Макаринская

Читайте дальше