Өрөспүүбүлүкэтээҕи төрүт үгэскэ киирбэт Аҕа күрэҕин улуустааҕы сүүмэрдиир түһүмэҕэ быйыл Болтоҥо нэһилиэгэр ыытыллар. Болтоҥо нэһилиэгиттэн урукку сылларга хас да өрөспүүбүлүкэтээҕи Аҕа күрэҕин кыайыылаахтара, призердара бааллар.
Күрэххэ 9 хамаанда кыттыыны ылар. Ол курдук, Болтоҥоттон Крыловтар уонна Седалищевтар, Мугудайтан Яковлевтар, Хатылыттан Барашковтар, Хоптоҕоттон Поисеевтар, Чурапчы нэһилиэгиттэн Дьячковскайдар, Кривошапкиннар, Лукиннар уонна Фоминнар.
Күрэхтэһии үөрүүлээх аһыллыытыгар улуус баһылыгын бастакы солбуйааччыта Егор Сивцев уонна улуус дьокутааттарын Сэбиэтин бэрэссэдээтэлэ, улуустааҕы Эр дьон түмсүүтүн салайааччыта Яков Оконешников эҕэрдэ тылларын эттилэр, “Оройуонун иннигэр үтүөлэрин иһин” 3-с истиэпэннээх бэлиэнэн Адаарыс Хохоон Дыгдаҕар уолун уонна Яков Кривошапкины наҕараадалаатылар. Болтоҥо нэһилиэгин баһылыга Сергей Ефремов күрэхтэһии кыттыылаахтарын эҕэрдэлээтэ, ким бэлэмнээх кыайарыгар баҕарда.
Кылаабынай судьуйанан Иван Лукин үлэлиэҕэ. Кыттааччылар ойбону алларыыга, чэйи оргутууга, остуолбаҕа ыттыыга, булчут биатлонугар, бэрэбинэни суоран, оттук маһын бэлэмнииргэ күрэхтэһиэхтэрэ.
Елена Макаринская