Ити Хатылы орто оскуолатын үөрэнээччилэрэ, төрөппүттэр уонна отделение оробуочайдара үгүстүк этэр тыллара этэ.
Комсомолец Гаврил Николаевич Аммосов 1965 сыллаахха Хатылы, оччотооҕуга аҕыс кылаастаах оскуолатыгар физругунан ананан кэлбитэ. Ол кэмҥэ оскуола оройуоҥҥа өнүйбэтэх үлэлээҕинэн биллэрэ.
Гаврил Николаевич хара маҥнайгыттан оскуолаҕа успуорт бары көрүҥнэрэ тэҥҥэ сайдалларын туһугар охсуспута. Кини түбүктээх үлэтин түмүктэрэ бастакы сылларыттан биллэн барбыта. Оскуола иһинэн тэриллибит ыспартыыбынай 7-с “а”, 8-с “б” үөрэнээччилэрэ кылаастарын бука бары бүтэрбиттэрэ, хаачыстыбаҕа да үөрэнии тупсубута. Ити оскуола үрдүнэн да үөрэххэ уонна иитэр үлэҕэ эмиэ үчүгэй сабыдыаллаах буолбута. Ол курдук, 1968 сыллаахха оскуола үрдүнэн үөрэҕи билии 95,6 бырыһыаҥҥа тэҥнэспитэ (оччотооҕуга ити балачча үчүгэй түмүк этэ). Успуорка даҕаны ситиһиилэр баар буолбуттара. Кэнники сылларга Хатылы аҕыс кылаастаах оскуолатын үөрэнээччилэрэ оройуоннааҕы күрэхтэһиилэргэ элбэхтик кыайыылааҕынан тахсыбыттара. Оттон Вася Дорогунов, Юра Ноговицын Ийэ дойду тэбэр сүрэҕэр Москваҕа оҕолор велосипедынан күрэхтэһиилэригэр кыттар кыахтаах ыспарсымыаннар буола үүммүттэрэ. Дуобат секцията утумнаахтык үлэлээн барбыта. Николаев Миша, Слепцов Ганя, Картузова Маша, Беляев Коля хаста да оскуолаларын, ону ааһан оройуон уонна өрөспүүбүлүкэ чиэһин көмүскэһэр дуобатчыттар буолбуттара. Кинилэр пионердар Бүтүн Сойуустааҕы күрэхтэһиилэригэр РСФСР чиэһин көмүскэһэн өйдөбүнньүк бэлэхтэрдээх эргиллибиттэрэ.
Кэлин Гаврил Николаевич Хатылы орто оскуолатыгар военругунан үлэлээбитэ. Оскуолаҕа байыаннай-патриотическай үлэ куһаҕана суохтук тэриллэрэ. Пионердар үгэс буолбут “Зарница” байыаннай-ыспартыыбынай оонньууларыгар хатылылар оройуоҥҥа инники миэстэҕэ сылдьаллара. Учуутал бэйэтин кыаҕынан үчүгэй байыаннай кабинеты тэрийбитэ.
Гаврил Николаевич оҕолору успуорка эрчийиитин бырахпатаҕа. Кыһыҥҥы каникулга өрөспүүбүлүкэҕэ икки төгүлүн ыытыллыбыт “Үрүҥ ладья” диэн пионерскай күрэхтэһиигэ Дьокуускай куорат 2-с нүөмэрдээх оскуолатын эдэр саахыматчыттарыгар очукуо эрэ аҥарынан хотторон, Хатылы үөрэнээччилэрэ иккис миэстэҕэ тахсыбыттаахтара. Женя Шарин, Ира Антипина биирдиилээн түмүккэ иккис миэстэ буолбуттара. Онтон Андрей Михайлов улахан дьоҥҥо 2-с разряд нуорматын толорбута.
Гаврил Николаевич Аммосов нэһилиэк, сопхуос уопсастыбаннай олоҕор көхтөөхтүк кыттара. Сайынын оҕолору түмэн үлэ уонна сынньалаҥ лааҕырын салайара.
Итинник киһи этэ, биһиги Гаврил Николаевичпыт.
Сэмэн ЖЕНДРИНСКЭЙ