Кини итинник аатынан отуттан тахса сыл үлэлээбитэ.
“Биир үлэҕэ итинник уһун кэмҥэ эҥкилэ суох үлэлээһин эдэр ыччакка үтүө холобур буолар”, — диэбиттээҕэ оччотооҕуга оройуоннааҕы бэтэринээринэй ыстаансыйа начаалынньыга Ю.П. Ксенофонтов, 1969 сыллаахха Кытаанах бэтэринээринэй пуунун сэбиэдиссэйэ Афанасьев Гаврил Егорович 50 сааһын туолуутун чиэстиир биэчэргэ.
Бэтэринээринэй сулууспа бэтэринээрэ эдэр эрдэҕинэ оройуон бэтэринээрдэрин салайбыта – кини бэтэринээринэй учаастак сэбиэдиссэйинэн үлэлии сылдьыбыта. Эдэр, үрдүк үөрэхтээх исписэлиистэр кинини солбуйбуттара уонна бэйэлэрин билиилэриттэн билсибиттэрэ. Оттон Гаврил Егоровичтан кини өр сылларга мунньуммут уопутун ылбыттара. Соловьев, Кытаанах, Сылаҥ нэһилиэктэригэр сүөһүнү иитии кэскилэ быһаарыллыытыгар бэтэринээринэй санитар, бэтэринээринэй пуун сэбиэдиссэйин быһыытынан, бэйэтин идэтинэн, кыаҕа тиийэринэн, улаханнык көмөлөһөрө.
Бэтэринээр диэн бэйэтэ туспа түбүктээх үлэ. Сүүһүнэн ынах уонна сылгы сүөһүгэ соҕотох үлэһит сүүрэр-көтөр. Түүн, күнүс. Дьыл ханнык кэмиттэн, хайдах күн турарыттан тутулуга суох.
Ити эбээһинэһи отут сыл устата үтүө суобастаахтык толорон Гаврил Афанасьев ССКП райкомун бүрүөтүн уонна райсовет исполкомун Бочуотунай грамоталарынан наҕараадаламмыта. Үбүлүөйдээччигэ махтал уонна эҕэрдэ суруктары, сыаналаах бэлэхтэри Кытаанах нэһилиэгин Сэбиэтин исполкомун, оройуоннааҕы производственнай управление, ветстанция, ветбаклаборатория, сопхуос олохтоох отделениетын дьаһалталарын, баартыйа тэрилтэлэрин, месткомнарын ааттарыттан М. Новгородова, Ю. Ксенофонтов, Н. Софронов о.д.а туттарбыттара.
Гаврил Егорович нэһилиэк уопсастыбаннай, култуурунай олоҕор көхтөөхтүк кыттара. Сопхуос отделениетын үлэтин-хамнаһын, кини бастыҥ дьоннорун туһунан оройуон уонна өрөспүүбүлүкэ хаһыаттарыгар суруйара, араадьыйанан бэрдэрэрэ. Оттон итэҕэстэр баар буоллахтарына, онно эйэлэспэтэ, селькор сытыы бөрүөтүнэн кириитикэлиирэ.
“Билигин бэйэлээх дьиэлээх-уоттаах киһибин, биэс оҕо аҕатабын. Туох да уһулуччу ситиһии суох. Күүһүм кыайарынан, санаам хоторунан таптаабыт идэбинэн үлэлиибин. Инникитин да ол курдук олоруом, үлэлиэм. Биһиэхэ маннык дьолу-соргуну, уйгу-быйаҥ олоҕу биэрбит хаан уруу быыртыйабар, Сэбиэскэй бырабыыталыстыбабар махтанабын!” – диэбиттээҕэ бэтэринээр Хабырылла.
Сэмэн ЖЕНДРИНСКЭЙ