Семен Александрович Филатовы, омос көрдөххө оннук тоҕо-хайа түһэн үлэлии сылдьара биллибэт курдуга. Ол гынан баран, үлэни болдьоҕор уонна хаачыстыбалаахтык толорорун бар дьоно бары билэллэрэ.
Сеня тулаайах хаалан, оҕо сааһын детдомҥа атаарбыта. Ийэ-аҕа бэлэмигэр үөскээбэтэх киһи, кини, кыһалҕаны, эрэйи эҥэринэн тэлбитэ. Оттон кэлин дьоллоох дьиэ кэргэн хаһаайына, икки оҕо амарах аҕатынан буолбута.
Бастаан Эрилик Эристиин аатынан колхуоска, оттон сопхуоска балтаһытынан сылдьыбыта. Кэлин барыга дьоҕурдаах уолга сыбаарка үлэтин итэҕэйбиттэрэ. Сеня сыбааркалыыр агрегакка туруоруллан төбөтүгэр шитогу кэтиэҕиттэн ыла хайыыы-үйэ уонтан тахса сыл ааһа охсубута.
Кини ханнык да түбэлтэҕэ ыраастык иһэрдэринэн уратылааҕа. “Баһылаабыт идэтэ”, — диэн тиэхэньикэ дьоно астына кэпсииллэрин оройуоне олохтоохторо оччотооҕуга үгүстүк истик буолаллара. Оннук үлэһит буһарбыт-хатарбыт ханнык баҕарар тиэхэньикэтин чаастара өр кэмҥэ эрэллээхтик туһаныллаллара.
От үлэтин үгэнигэр, сыбааркалааччы саамай наадалаах киһинэн буолара. Ол да иһин Семен Александрович хас мүнүүтэни, чааһы муҥутуур көдьүүстээхтик туһанарга кыһанара. Быһата, былдьаһыктаах күннэргэ, утуйар уутун, сынньанан олоро түһэрин умнубут уопуттаах оробуочай күнүстэри-түүннэри чаҕылыҥнаан сылаас салгыны тырыта суруйар сырдык уота ыһыахтана оонньуура сүргэни көтөҕөрө.
Сэмэн ЖЕНДРИНСКЭЙ