Бахсыга 40-тан тахса киһи улуус баһылыгын отчуотун иһиттэ. Отчуот саҥа киирбит култуура дьиэтигэр буолла.
Быйыл үүтү туттарыыларын көрдөрүүлэрэ үчүгэй, ол эрээри арыы сыаҕа эргэрэн, күчүмэҕэйдэри үөскэтэрин эттилэр. Маныаха “Чурапчы” ТХПК бэрэссэдээтэлэ Николай Петров саҥа арыы сыаҕын тутуута эһиилги былааҥҥа баарын эттэ.
Маны таһынан үүккэ уонна сүөһү төбөтүгэр бэриллэр харчы, суол оҥоһуутун, уот линиятын, УЗИ, МРТ, соцконтракт туһунан ыйытыылар киирдилэр. Хочуолунайга баар 4 оһох эргэрбитин эттилэр, эбии саҥа оһоҕу туруорустулар.
Бахсы олохтооҕо Елена Гоголева нэһилиэккэ 20-чэ сулумах эр дьон баарын, онон демографическай балаһыанньа тупсарыгар былааннаах үлэ барыан наадатын эттэ.
Оскуола дириэктэрэ Алина Гоголева оскуола эргэрэн, кабинеттар тымныйбыттарын бэлиэтээн, капитальнай өрөмүөнү туруоруста.
Олохтоохтор үлэни сөптөөҕүнэн сыаналаатылар.
Елена Макаринская