Бэс ыйын 26 күнүгэр Николай Тарскай аатынан «Туймаада» стадиоҥҥа «Азия оҕолоро» норуоттар икки ардыларынааҕы VIII спортивнай оонньуулары үөрүүлээхтик аһыы сиэрэ-туома үрдүк таһымнаахтык ыытылынна. Бу историяҕа хаалар култуурунай бырагыраамаҕа 3500 кэриҥэ киһи кытынна. Дьон-сэргэ бу улахан тэрээһини биир тыынынан умсугуйа көрдө.
Тэрээһин саҕаланыытыгар 24 дойдуттан уонна 4 федеральнай уокуруктан 3,5 тыһыынчаттан тахса спортсмен уонна судьуйалар сэлэлии хааман киириилэрэ буолла. Кыттааччыларга СӨ Ил Дархана Айсен Николаев эҕэрдэлээн туран: «“Азия оҕолоро” оонньуулар биһиэхэ улахан спортивнай тэрээһин эрэ буолбакка, духуобунай уонна култуурунай сыаннастарбыт бэлиэтэ, биһиги инникибит кэскиллээҕин уонна дьулуурдаахпытын көрдөрөр. Маны барытын биһиги бастакы Бэрэсидьиэммит Михаил Ефимович Николаев түстээтэ. Биһиги бары Сахабыт сиринэн киэн туттабыт. Биһиги сүрүн баайбыт үйэттэн үйэҕэ күн бүгүҥҥэ диэри төрөөбүт дойдуларыгар үлэлээн-хамсаан кэлбит норуоттар сомоҕолоһуулара уонна доҕордоһуулара буолар”, — диэн бэлиэтээтэ.
Манна «Арктика куйаарыгар айан» диэн сүрүн дьоруойдар — оҕолор мүччүргэннээх сырыыларын көрдөрүү саамай чаҕылхай түгэнинэн буолла. Театрилизованнай дьүһүйүү ис хоһооно Тымныы Оҕуһун уонна Күн Дьөһөгөй номоҕор олоҕурда. Бу көрдөрүүгэ Саха биллиилээх артыыстара, үҥкүүһүттэрэ уонна улуустартан үөрэнээччилэр үҥкүүлэрин бөлөҕө кытыннылар. Сөҕүмэр киэҥ декорациянан Сахабыт сирин барҕа баайын, кэрэ айылҕатын толору арыйдылар.
«Азия оҕолоро» спортивнай оонньууларын сүрүн уотун боксаҕа Арассыыйа спордун үтүөлээх маастара, бастакы «Азия оҕолоро» оонньууларын кыайыылааҕа Георгий Балакшин уматта.
Герасим Платонов, улуус бэтэрээн спортсменнарын Сэбиэтин бэрэссэдээтэлэ: «Өрөспүүбүлүкэ спорт бочуоттаах бэтэрээннэрин иһигэр киирсэн, Чурапчыттан сэттиэ – Виктор Дьяконов, Мария Попова, А. Кардашевская, Светлана Башарина, Ульяна уонна Семен Морфуновтар, Егор Абрамов уонна мин буолан, тэрээһин үөрүүлээх аһыллыытыгар сылдьар чиэскэ тигистибит. Дьокуускайга кэлэрбитигэр тырааныспарынан хааччыйбыт улуустааҕы спорт салалтатыгар, начаалынньык Дьулустаан Егоровка махтанабыт. Олус элбэх, сонун туруоруулаах улахан тэрээһин буолла. Дьон-сэргэ да стадиону толору мустубут. Барыта сыа—сым курдук салҕанан үчүгэй спорт бырааһынньыга буолла. Стадиоҥҥа 2000-тан тахса спортсмен анал формалаах сэлэлии хааман киирбиттэрэ көрөргө астык, киэн туттуу санаата үөскээтэ. Аны бу оҕолорбут илин-кэлин түсүһэллэрин көрүөхпүт турдаҕа. Ким күүстээх, үчүгэй бэлэмнээх – ол кыайдын!”, — диэн тус санаатын үллэһиннэ.
Санатан эттэххэ, Саха сирэ 370 спортсменнаах икки хамаанданы туруорда. Бастакы хамаанда спорт 24 көрүҥэр, иккис 21 көрүҥҥэ күрэхтэһиэхтэрэ. Кыттар оҕолорбутугар ситиһиилэри баҕарабыт.
Марфа Петрова.