“Азия оҕолоро” оонньуу уотун Чурапчы улууһун олохтоохторо, спортсменнар, уопсастыбаннас көрүстүлэр. Уоту “Боотур Уус” стадионтан саҕалаан, киин уулуссанан дьон-сэргэ үөрүүтүнэн арыаллатан, киин болуоссакка эстафеталаан аҕаллылар.
Эстафетаны бастакынан улуус дьокутааттарын Сэбиэтин бэрэссэдээтэлэ Яков Оконешников саҕалаата. Салгыы факелы Гавриил Нохтунскай, Спиридон Макаров, Ульяна Слепцова, Валерия Кобелькова, Иван Пермяков, Любовь Кардашевская, Реворий Елисеев, Сергей Новгородов, Иннокентий Готовцев, Алексей Кардашевскай, Станислав Захаров уонна Айтал Григорьев тутан аҕаллылар.
Улуус баһылыгын 1-кы солбуйааччыта Егор Сивцев бэлиэ түгэнинэн эҕэрдэлээтэ. Уоту араҥаччылааччы, волейболист Игорь Афанасьев эҕэрдэ тылын этэн туран, факелы Егор Сивцевкэ туттарда.
Үөрүүлээх дьаһал түмүгэр “Юные якутяне” өрөспүүбүлүкэтээҕи спартакиадаҕа кытта барар оҕолорбутун алгыстаан атаардылар, ону сэргэ тэрийээччилэри уонна урукку чемпионка Марианна Макарованы кытта пресс-конференция тэрилиннэ.
Тэрээһинтэн сиһилии уонна интервьюлары видеоҕа көрүҥ.
Елена Макаринская