Г. Д. Протодьяконов аатынан Алаҕар орто оскуолатын дириэктэрэ ВалентинаМаксимова «Ситиhиилээх дьон» бырайыагы үөрэнээччилэргэ анаан тэрийдэ.
Бырайыак соруга: биллиилээх биир дойдулаахтарбытын үөрэнээччилэри кытта көрүһүннэрии.
Бырайыакпыт маҥнайгы ыалдьытынан убаастыыр биир дойдулаахпыт ТатьянаГоголева буолла. Кини 7-11-с кылаас үөрэнээччилэрин кытта атах тэпсэн олорон сэһэргэстэ.
Татьяна Афанасьевнаны Саха сирэ бүттүүн билэрэ буолуо диэтэхпинэ сыыспатым чахчы. Кини «Хотугу сулус» куонкурус, оҕо телерадиоакадемиятын төрүттээччи буолар.
Татьяна Афанасьевна үөрэнээччилэри кытта сэһэргэһиитигэр идэни таба талыы туһунан, төрөөбүт дойдуга бэриниилээх буолуу уонна үөрэххэ тардыһыы тула кэпсэттэ, аныгы үйэҕэ бары өттүнэн сайдыылаах, түргэн туттунуулаах, ураты көрүүлэрдээх каадырдар наадаларын тоһоҕолоон эттэ.
Түмүккэ биһиги бары үөрэхтээх, билиҥҥиттэн сөптөөх идэҕэ таба тайанан дойдубутугар туһа киһитэ буола улаатарбытыгар баҕа санаатын эттэ. Татьяна Афанасьевна кэлэн ыалдьыттаабытыгар махтанабыт уонна«Ситиһиилээх дьон» бырайыак аныгыс ыалдьытын кэтэһэбит.
Алик Копырин, Г. Д. Протодьяконов аатынан Алаҕар орто оскуолатын 11-с кылааһын үөрэнээччитэ, «Алаҕар Кэскилэ» медиа киин