Тохсунньу 8 күнүгэр, Дойдубут тэбэр сүрэҕэ Улуу Москуба куоракка, сылын аайы ыытыллар “Мир на ладони” норуоттар икки ардыларынааҕы ускуустуба бары көрүҥэр ыытыллар бэстибээлгэ “Алаҕар далбардара” икки үҥкүүнэн уонна омуктар төрүт таҥастарын көрүҥэр ситиһиилээхтик кытыннар дьону-сэргэни улаханнык сөхтөрдүлэр.
Онежскайдааҕы култуура киинигэр тыыннаах эрдэттэн ырыа, үҥкүү, муусука кэрэ эйгэтигэр абылаппыт, оҕо-уруу, улахан дьон мустаннар тэрээһин олус үрдүк таһымҥа ааста.
Куонкурус түмүгүнэн “Алаҕар далбардара” Сахабыт сирин, төрөөбүт Чурапчыларын улууһун улаханнык ааттатан, дохсун ытыс тыаһын доҕуһуолунан Гран-при, ону таһынан 1-кы истиэпэнннээх лауреат, национальнай көстүүмнэргэ эмиэ 1-кы истиэпэннээх лауреат уонна 10 тыһ. сууммалаах сэртэпикээтинэн, итиэннэ грантовай куонкуруска официальнай ыҥырыы суругу ылары ситистилэр.
“Итини сэргэ дьүүллүүр сүбэ үҥкүү ис хоһоонун, туруоруутун, толорууну, муусукабытын олуһун хайҕаан хореографпытын Ольга Егоровнаны махтал суругунан бэлиэтээтэ.
Салайааччыбыт Анфиса Егоровна прикладной ускуустуба куонкуруһугар кыттан 1 истиэпэннээх лауреат үрдүк аатын ылбытынан түгэнинэн туһанан истиҥник эҕэрдэлиибит! Барыта санаа хоту салаллан истин, кырдьыыга бэриммэккэ, бука бары үөрэ-көтө үҥкүүнү өрө тутуоҕун, үҥкүүһүт эбээлэрбит чэгиэнник сырыттыннар!” – диэн “Алаҕар далбардара” бэйэлэрин санааларын үллэстэллэр.
Сэмэн ЖЕНДРИНСКЭЙ