Бүгүҥҥүттэн, СӨ култууратын уонна духуобунай сайдыыга миниистирэ ааспыт 2024 сыллаах отчуотун кытары тэҥҥэ, СӨ Баһылыгын дьаһалынан тэриллибит Үрдүкү инновационнай менеджмент оскуолатыгар СӨ култууратын тэрилтэлэрин салайааччыларыгар уонна исписэлиистэригэр аналлаах сүбэ мунньах саҕаланна.

Манна өрөспүүбүлүкэ үрдүнэн култуура дьиэлэрин бэйэ икки ардыларыгар ааспыт сылга, «Пушкинскай каарта» нөҥүө төһө дохуоту киллэрбиттэрин туһунан улахан иһитиннэриини оҥордулар. Ол онно көрдөххө “Айылгы” НАДь-тэ (дириэктэр Розалия Игнатьева, дириэктэри эргиэн боппуруостарыгар солбуйааччы Алена Саргыдаева) ааспыт сылга, «Пушкинскай каарта» национальнай бырайыак чэрчитинэн 20 өрөспүүбүлүкэ таһымнаах тэрээһиҥҥэ 2638 билиэти атыылааннар киллэрбит үптэрэ 2 мөлүйүөн 897 тыһыынча 400 солкуобайга тэҥнэһэн түмүккэ инники күөҥҥэ таҕыстылар.

Манна Д.Ф. Ходулов аатынан Мэҥэ Хаҥалас улууһунааҕы НАДь-тэ төһө даҕаны 245 тэрээһини ыыппытын итиэннэ 4758 билиэти атыылаабытын үрдүнэн 2 мөлүйүөн 265 тыһыынча 500 солкуобайы киллэрэн биһиги дьоммутуттан 631 тыһыынча 900 солкуобайынан сабырыйтарда. Ол кэнниттэн Дьокуускай куорат уонна Таатта улууһа ааттаннылар.

 

Сэмэн ЖЕНДРИНСКЭЙ