Анал байыаннай дьайыы саҕаланыаҕыттан Дойду үрдүнэн байыаннай дьайыы кыттыылаахтарыгар, кинилэр дьиэ кэргэттэригэр араас хабааннаах көмө миэрэлэрэ оҥоһуллаллар. Былырыын Дойду Бэрэсидьиэнэ Владимир Путин көҕүлээһининэн «Аҕа дойдуну көмүскээччилэр» судаарыстыбаннай пуонда аһыллыбыта. Бу пуонда Саха сиринээҕи филиала былырыын бэс ыйыттан, оттон улууспутугар ахсынньыттан аһыллан үлэлиир.
Пуонда үлэтин-хамнаһын туһунан Чурапчытааҕы филиал социальнай координатора Сергей Атласов кэпсиир: «Аҕа дойдуну көмүскээччилэр» судаарыстыбаннай пуонда байыаннай сулууспаттан төннүбүт уонна өлбүттээх анал байыаннай дьайыы кыттыылаахтарын дьиэ кэргэннэрин чилиэттэригэр көмөнү оҥоруу үлэтин ыытыы буолар. Ону таһынан, байыаннай дьайыы хайысхатынан кыһалҕалаах дьоҥҥо, туора турунан кэбиспэккэ, төһө кыалларынан көмөлөһө сатыыбыт.
Тэриллиэхпититтэн, түөрт ый иһигэр, уопсайа 200-чэкэ туһааннаах ыйытык киирэн, күн бүгүн 160-на быһаарылынна. Саамай элбэх ыйытык бэтэрээн дастабырыанньатын оҥорторуу уонна ылыы, социальнай өйөбүл, харчынан төлөбүрдэри анааһын боппуруостарыгар киирэр. Ону тэҥэ, байыаннай сулууспаттан бүтэн кэлбит биир дойдулаахтарбытын улэ булалларыгар, мэдиссиинэ хайысхатын боппуруостарыгар, санаторийдарга, курордарга эмтэнии өҥөтүн боппуруостарыгар ыйан-кэрдэн көмөлөһөбүт. Үгүс дьиэ кэргэн кинилэргэ туох-ханнык көмө көрүллэрин билбэттэр, олорго көмө буолабыт. Байыаннай дьайыы кыттыылаахтарын оҕолоро уһуйааҥҥа усунуоһу төлөөбөттөр, үөрэнээччилэр оскуолаҕа босхо аһыыллар. Анал спортивнай куруһуокка дьарыктанар оҕо ыспартыыбынай таҥаһа босхо хааччыллар.
Маны таһынан анал байыаннай дьайыы кыттыылаахтарыгар уонна кинилэр дьиэ кэргэттэрин чилиэннэригэр улууспутугар олохтоммут көмөлөр бааллар. Ол курдук, Дьокуускай куоракка автобуһунан ыйга биирдэ, таксинан сылга биирдэ баран кэлии босхо көрүллэр. Улуус иһинэн сүүрэр маршрутнай автобуска, баанньыкка, улуус иһинэн ыытыллар култуурунай тэрээһиннэргэ босхо сылдьар кыахтаахтар. «Айыллаан» киинэ тыйаатырыгар оҕолор босхо, улахан дьон 50% чэпчэтиилээх сылдьар бырааптаахтар. Оҕо уонна дьахтар консультациятыгар уочарата суох көрдөрөр, уһуйааҥҥа уочарата суох киирэр кыахтаахтар».
“Аҕа дойдуну көмүскээччилэр” судаарыстыбаннай пуонда филиала Чурапчы нэһилиэгэр Ленин аатынан уулусса, 41-гэр улуус дьаһалтатын дьиэтигэр, 117 кэбиниэккэ үлэлиир. Билсэр төлөпүөн: 8(984)1095496. Ким тустаах кыһалҕалаах, боппуруостаах бу аадырыска тиийэн, эрийэн сүбэлэтиэн, көмөлөһүннэриэн сөп.
Людмила Горохова