Кэрэ аҥаардар күннэригэр Дьокуускайга аан маҥнайгытын ыытыллар «Аар Кудай» норуоттар икки ардыларынааҕы кэрэ сэбэрэ уонна сырдык ис турук куонкуруһа саҕаламмыта. Манна Сахабыт Сирин араас муннуктарыттан уопсайа 45 кэрэ куо кыттыыны ыла сылдьар. Олор истэригэр 13-с нүөмэринэн биһиги кыыспыт, кэскиллээх балерина Сахайаана Сатыбалдиева баар. Кини ураты араспаанньатын көрөн, үгүс киһи хантан хааннаах, кимтэн кииннээх кэрэ куо буоларын интэриэһиргээбит буолуохтаах. Бүгүн Сахайаанаҕа эрийэн, бэйэтин билиһиннэрэригэр көрдөстүбүт.
— Үтүө күнүнэн! Мин Чурапчыттан төрүттээхпин, маҥнайгы кылааска Чурапчы орто оскуолатыгар үөрэммитим. 2011 сыллаахха Оҕо ускуустуба оскуолатын үҥкүү кылааһыгар киирбитим. Онно миигин бэлиэтии көрөн, төрөппүтэрбэр Балет оскуолатыгар ыыталларыгар сүбэлээбиттэрэ. Онон Аксения уонна Наталья Посельскайалар ааттарынан Дьокуускайдааҕы Балет оскуолатыгар тиийэн, кастины ааспытым. Онтон ылата үҥкүү алыбар ылларан, умсугуйан туран, сөбүлээн дьарыктанабын. 2023 сыллаахха үөрэхпин ситиһиилээхтик бүтэрбитим. Биһиги бу оскуола номнуо ХVII выпуһа буолабыт. Дипломмун ылан, ол күһүн Сергей Зверев – Кыыл Уола аатынан Национальнай үҥкүү тыйаатырыгар артыысканан үлэлии киирэн, күн бүгүҥҥэ диэри айа-тута сылдьабын.
Сахайаана Сатыбалдиева төрүттэрин билиһиннэрдэххэ, аҕатын ийэтэ — үрдүк категориялаах повар Октябрина Николаевна Макарова. Кини Мындаҕаайыттан төрүттээх, сааһын тухары олохтоох уһуйааҥҥа, лааҕырга асчытынан таһаарыылаахтык үлэлээбит. Нэһилиэккэ минньигэс астаах повар быһыытынан биллэр. Оттон эһэтэ Бектурсун — Киргизияттан төрүттээх. Октябрина Николаевнаны кытта БАМ-ҥа үлэлии сылдьан билсэн, сөбүлэһэн, ыал буолан, Чурапчыга олохсуйбуттар. Сахайаана төрөппүттэрэ Заир уонна Назира — Чурапчы биир бастыҥ урбаан эйгэтин үлэһиттэрэ буолаллар. Норуокка биллэрдии, «биэс этээстээх» атыы-эргиэн киинигэр баар дьоҕус кафеларыгар кэлбит дьону минньигэс араас аһынан көрсөллөр. Сатыбалдиевтар үс оҕолоохтор. Сахайаана — ыал улахан оҕото, икки бырааттаах.
Бу «Аар кудай” күрэххэ Киргизияттан, Бурятияттан, ону сэргэ Намибия, Ботсвана курдук ыраах Соҕуруу Африка дойдуларыттан тиийэ бэрэстэбиитэллэр кыттыыны ыла сылдьаллар. Гранд- Финал кулун тутар 16 күнүгэр Суорун Омоллоон аатынан Опера уонна Балет судаарыстыбаннай тыйаатырыгар ыытыллар. Муҥутуур кыайыылаах Индияҕа барар путёвканан уонна 1 мөлүйүөн солкуобайдаах бирииһинэн наҕараадаланыаҕа.
Онон бэйэбит төрүт олохтоох кыыспытын, эдэр талааннаах ыччаппытын өйүөҕүҥ, ситиһиилэри баҕарыаҕыҥ.
Марфа Петрова.