Е.А Борисов аатынан Чурапчытааҕы киин бибилэтиэкэҕэ «Умсулҕан» түмсүү көҕүлээһининэн валяниеҕа маастар-кылаас ыытылынна. Бу интэриэһинэй дьарыгы сэҥээрээччилэр түмсэн, сахалыы олбохтору оҥордулар. Сылаас бараан түүтүттэн оҥоһуллубут олбох илдьэ сылдьарга чэпчэки, сылаас, сымнаҕас, ураты көстүүлээх мал буолар. Маастар-кылааһы иилээн-саҕалаан Римма Дьячковская ыытта. Кини эрдэ оҥорбут оҥоһуктарын кэлбит дьон-сэргэ кэрэхсии көрдүлэр.
Маастар-кылаас кыттыылаахтара өҥү-дьүһүнү сөпкө дьүөрэлээн, илиилэрин сылааһынан имэрийэн-томоруйан кэрэ көстүүлээх, үйэлээх олбохтору оҥорон астыннылар. Бу оҥоһуктар дьиэ иһин өссө тупсаҕай гына киэргэппиттэригэр эрэнэбит. Валяние ньыматынан оҥоһуллубут олбоҕу илдьэ сылдьарга да үчүгэй, чугас дьоҥҥо да туһалаах бэлэх буолар. Римма Гаврильевна бу баһылаабыт дьарыгын кистэлэҥнэригэр үөрэппитигэр махтанабыт. Инникитин да маннык маастар-кылаастары тэрийэ турарыгар баҕарабыт.
Сардаана Дьячковская, Чурапчытааҕы киин бибилэтиэкэ үлэһитэ.