Константин кэргэнинээн Александралыын Чурапчы нэһилиэгин киин уулуссатыгар шашлык киоскатын аһан үлэлэппиттэрэ икки сыл буолла. Бүгүн Елена Волкова кинилэр хайдах үлэлии-хамныы сылдьалларын көрдө.
Константин Седалищев: «2020 сыллаахха социальнай хантыраагынан 150 тыһ ылан, дьиэбитигэр ас астаан атыылыыртан саҕалаабыппыт. Онтон 2021 сыллаахха Чурапчы нэһилиэгин дьаһалтата сир биэрэн, бу киоскабытын туттубуппут. Туттан баран, Дьарыктаах буолуу киинин нөҥүө 150 тыһ ылан, оборудование атыылаһан шашлык оҥорон, үлэбитин салҕаабыппыт. Былырыын улуус баһылыга өйөөн, 250 тыһ биэрбитинэн, билигин уһаайбабытыгар сыах тутта сылдьабыт», — диэн кэпсиир.
Урбаанньыттар инникитин саҥа сыаҕы тэҥэ нэһилиэк киин болуоссатыгар аһыллыахтаах кафеҕа миэстэ ылан үлэлиири былаанныыллар. Бэйэ дьыалатын кэҥэтинэргэ эбии үлэһиттэри ылыахпыт диир.
Миниистир Елена Волкова урбаанньыт кэпсээнин, былааннарын истэн үөрдэ, үлэлэригэр ситиһиилэри баҕарда уонна урбаан эйгэтигэр көрүллэр бырагыраамалары кэпсээтэ.
Санатан эттэххэ, Үлэ миниистирэ бүгүн СӨ Бырабыыталыстыбатын бэрэссэдээтэлин солбуйааччыта Георгий Степанов Чурапчыга оробуочай сырыытын дэлэгээссийэтин кытта сылдьар.
Елена Макаринская