Аан дойдутааҕы Дьиэ кэргэн күнүгэр анаммыт декада чэрчитинэн улууска араас хабааннаах дьаһаллар ыытылыннылар. Ол иһигэр волонтердар, ыччаттар соҕотох олорор кырдьаҕастарга, Анал байыаннай дьайыы кыттыылаахтарын дьиэ кэргэттэригэр уо.д.а. кыаммат араҥаҕа киирэр ыалларга көмөлөстүлэр.
С.А. Новгородов аатынан Чурапчы орто оскуолатын 7 «в» кылааһын уолаттара кылаас салайааччыларын Дмитрий Петрович Соловьевы кытта үтүө дьыаланы оҥордулар. Кинилэр тыыл, үлэ бэтэрээнигэр Матрена Феофановаҕа иһэр мууһун тиэйэн биэрдилэр.
«Саас мууспун олорор дьиэм таһыттан, өр сылларга миэхэ социальнай үлэһитинэн үлэлээбит Елена Дмитриевна Лукина бэйэтин булууһугар тиэйтэрбитэ. Елена Дмитриевна күһүн, Аҕам саастаахтар күннэригэр бу 7 «в» кылаас салайааччытын Дмитрий Петровиһы кытта кэпсэтэн, үөрэнээччилэр мууспун киллэрбиттэрэ. Дьэ бу буолар, оҕолору улахан киһи бэйэтин холобурунан, батыһыннаран, илэ-чахчы кыаммат кырдьаҕаска, соҕотох киһиэхэ көмөлөһүннэрэ үөрэтии. Оҕолор үтүөнү оҥорон, кырдьаҕаһы үөрдэн, кини истиҥ махталын ылан астыналлара саарбахтаммат. Оҕолор доҕотторун кытта сэһэргэһэ-сэһэргэһэ үлэлээн да, сынньаннахтара. Бачча саастарыттан үтүө дьыалаҕа кыттыһар оҕолор, норуокка туһалаах, үтүө санаалаах, үлэһит, үөрэхтээх дьоһун дьон буола улааталларыгар эрэнэбин. Мууспун социальнай харалта массыынатынан суоппар Дмитрий Николаевич Евграфов тиэйдэ«, — диэн 90 саастаах ытык кырдьаҕас Метрена Ивановна махталын тиэрдэр. Эдэр дьоҥҥо ыллыктаах алгыһын аныыр:
— Лоһуор от үктэллэнэн, сырдык ыллык суолланан, Айыыһыккыт арыаллаан, аартыккыт санааҕыт хоту арыллан истин! Баҕа санааҕыт томточчу туоллун, ыарыы ыалласпатын, дьол эрэ доҕордостун, ил-эйэ эҥэрдэстин!
Марфа Петрова