Күүстээх Дэһээккин кэриэһигэр ыытыллар өрөспүүбүлүкэтээҕи мас тардыһыы финальнай киирсиилэри бэрт элбэх киһи көрө кэлбит. Кинилэр быыстарыгар биһиги, билигин Алексей уонна Матрена Павловтар салайар Үүнэр көлүөнэ тыйаатырдарын артыыһа Татьяна Хомподоеваны бэлиэтии көрөн, ыҥыран ылан кэпсэттибит.
Тохсунньу 27 күнүттэн, “Саха” НКИХ-гар үгүс киһи кутун туппут, прозаик Валентина Гаврильева драматынан, Катерина Григорьева-Кэрэмэс Сыдьаай сценарийынан, режиссер Елена Эверстова туруоруутугар 20 сиэрийэлээх, ХХ-с үйэ өрөбөлүүссүйэ иннинээҕи саха олоҕун көрдөрөр сериал көстө турар.
Ол онно Даайыс сүрүн оруолугар биһиги биир дойдулаахпыт, Мырылаттан уонна Одьулуунтан төрүттээх, Семен Новгородов аатынан Чурапчы орто оскуолатын выпускницата, эрдэ манна “Айыллаан” КК-гэр итиэннэ Петр Решетников аатынан норуодунай тыйаатыр туруорар испээктээктэригэр чаҕылхай оруоллары толорбут, “Чолбон” үҥкүү ансаамбылын солбуллубат чилиэнэ Татьяна Хомподоева оонньуур.
- Билигин идэҕинэн үлэлии сылдьар киһи буоллаҕын?
- Сөпкө эттиҥ, бэйэм 2017 сыллаахха Арктикатааҕы үнүстүүккэ драматическай тыйаатыр уонна киинэ артыыһын идэтин бүтэрбитим. Куоракка тиийээт “Дьикти саас” испэктээккэ Айта Бархатова оруолун толорбутум, эрдэ манна эмиэ норуодунай тыйаатырга оонньуу сылдьыбытым. Биһиги тыйаатырбыт сүрүн туруоруутунан оҕолорго аналлаах “Дьол тааһа” буолар, онно Чанди диэн хараҕынан көрбөт кыыс оруолун толорбутум.
- Киинэ эйгэтигэр хайдах киирбиккиний?
- Киинэҕэ бу үһүс уһуллааһыным буолар, бу иннинэ “Кыргыттар” диэн сериалга быстах оруолу толорбуттааҕым ол кэнниттэн үгүс дьоҥҥо өйдөнөн хаалбыт “Харчы” сериалга эмиэ кылгас оруоллаах этим, ол эрэн режиссер Елена Эверстованы кытары олуһун тапсаммыт 11 дуу, 12 дуу сценаны икки күн иһигэр устан бүтэрбиттэрэ. Онтон ааспыт сыл кулун тутар ыйыгар, Лена бэйэтэ суруйан, сыллааҕы былааннарыгар киирбит бырайыакка “хайаан даҕаны эйигин биир оруолга ылабын” диэн эппитэ. Итиннэ тутатына сөбүлэспитим.
- “Уот Дьулустааҥҥа” уһуллар төһө ыарахан этэй?
- Даайыһы оонньуубун… Бу айымньы эрдэттэн пьеса эҥин быһыытынан суруллубатах буолан сорох персонажтар эбиллэн биэрбиттэрэ. Манна тыла-өһө ураты этэ, аһары уус-уран да буолбатах аны олус судургу эмиэ буолбатах. Тылларын үөрэтии саамай уустук этэ диэхпин сөп. Манна өссө бэлиэтээн эттэххэ, бу сериал аан бастакытын Валерия Черова диэн туруорааччы-худуоһунньуктаах үлэлээтэ, бастакы холонуу буолла. Бу иннинээҕи сериалга итинник сценаны холобура, балаҕан иһинээҕи көстүүнү бэлэмнээн туруоруу диэн суоҕа.
- Бэйэм оруолбут төһө үчүгэйдик толордум дии саныыгыный эбэтэр олох көрбөккүн дуу?
- Бастакы нэдиэлэни көрбүтүм, дьиҥэр бэйэбин экраҥҥа көрөр наһаа ыарахан. Син биир идэм да быһыытынан буолуо “ээ, манна итинник гыныахтаах эбиппиин” эҥин диэбит курдук саныы олороҕун. Аны киинэҕэ испэктээккэ курдук иккистээн тиийэн оонньоон уһуллубаккын. Холобура, бу испэктээккэ оонньоотуҥ онтон бүппүтүн кэнниттэн ырытан көрөн бараҥҥын аныгыскы оонньооһуҥҥар көннөрүнэҕин. Онтон киинэҕэ оннук буолбатах! (Күлэр) Олус интэриэһинэй.
- Успуорду төһө сөбүлүүгүнүй?
- Биһиги идэбитигэр өрөбүлүҥ хаһан буолара биллибэт. Ол иһин икки күн өрөөбүччэ дойдубар кэлэ сылдьабын, доҕотторбун көрүстүм уонна бачча улахан өрөспүүбүлүкэтээҕи мас тардыһыыта буола турарын хайдах куоттарыамый?! Көрөбүн. Бэйэм успуорду оҕо эрдэхтэн сөбүлүүбүн, оннук айылаах үлүһүйбүт биир көрүҥүм суох эрээри ОФП-ны үчүгэйдик туттарааччыбын. Ыспарсымыан буолбутум эбитэ буоллар ортоку кирбиигэ сылдьыам эбитэ буолуо (Үөрэр)
- Инники олоххун тыйаатыры кытары сибээстигин?
- Оннук, талан ылбыт идэм. Алексей уонна Матрена Павловтар салайар Үүнэр көлүөнэ тыйаатырдара быйылгы дьыллаахха Уус Алданнар биир чулуу киһилэрэ, Майаҕатта Бэрт Хара туһунан испиктээги туруордулар. Онно Дыгын Дархан кыыһын Арылы Куо Айталы уобараһын толоробун, кини Майаҕаттаҕа эргэ тахсар. Ол испэктээги олунньу ыйын 25-28 күннэригэр Уус Алдан нэһилиэктэринэн гостуруоллуу барыахтаахпыт. Бу олус улахан туруоруу, тыйаатыр үлэһиттэрэ бары кэриэтэ баарбыт, режиссерунан Александр Васильевич Титигиров буолар. Биһиги тыйаатырбыт уруккуттан даҕаны патриотизм тиэмэтин мэлдьи өрө тутан кэллэ, ити санааны уһугуннарыыга, бөҕөргөтүүгэ наһаа күүскэ үлэлиир дии саныыбыт. Салайааччыбыт Алексей Прокопьевич бэйэтэ эмиэ итинник туспа көрүүлэрдээх киһи буолар. Ол иһин хас биирдии туруоруллар испэктээк эрдэттэн талыллан, ырытыллан туруоруллар.
Биир дойдулаахпыт инники үлэтигэр-хамнаһыгар ситиһиилэри, кытаанах доруобуйаны баҕарыаҕын.
Кэпсэттэ Сэмэн ЖЕНДРИНСКЭЙ. Хаартыска Татьяна Хомподоева тус архыыбыттан