Бүгүн, Мугудай нэһилиэгин “Чуораанчык” уһуйааныгар, улууска “Сыл бастыҥ иитээччитин” быһаарар идэлээх баспытаталлар анал куонкурустара ыытылынна.
Кыттааччылары билиһиннэрдэххэ Алаҕар нэһилиэгин “Алгыс” уһуйааныттан Анна Баишева, Хатылы нэһилиэгин “Ньургуһун” уһуйааныттан Татьяна Парфенова, Сылаҥ нэһилиэгин “Сулусчаан” уһуйааныттан Наталья Трофимова, Хоптоҕо нэһилиэгин “Ыллык” уһуйааныттан Мария Прядезникова, Чурапчы нэһилиэгин М.Т. Спиридонова аатынан “Чуораанчык” уһуйааныттан Лариса Монастырева уонна Чурапчы нэһилиэгин П.И. Борисова аатынан “Улыбка” уһуйааныттан Анастасия Нестерова илин-кэлин түсүһэннэр бэйэлэрин сатабылларын итиэннэ уопуттарын атастастылар.
Иитээччилэр икки түһүмэҕинэн күрэхтэстилэр ол курдук оҕолорго аһаҕас дьарыгы ыыттылар онтон салгыы оҕону иитиигэ уонна сайыннарыыга туһуламмыт ньымаларыгар маастар кылаастары көрдөрдүлэр. Манна даҕатан эттэххэ куонкурус кыттыылаахтара бары үчүгэй бэлэмнээхтэрин, аныгы бэдэрээлинэй үөрэтэр бырагыраамма ирдэбиллэригэр билиилэрин толору дакаастаатылар.
Ол гынан баран куонкуруска хайаан даҕаны муҥутуур кыайыылаах ааттанар, бу да сырыыга “Улыбка” уһуйаан (сэбиэдиссэй Екатерина Иванова) аҥардастыы өрөгөйдөөтө. Атын да кыттааччылар кистээбэккэ: “Анастасия кыайыаҕын кыайда!” – диэн үөрэ-көтө кэпсээтилэр.
Инньэ гынан, 2024 сыл кулун тутар ыйыгар Анастасия Николаевна Нестерова, өрөспүүбүлүкэҕэ Чурапчы улууһун чиэһин көмүскүү барар чиэскэ тигистэ. Улуустааҕы үөрэх управлениетыгар итиэннэ “Улыбка” уһуйаан тэрийэр хамаандатыгар таһаарыылаах үлэни, кыайыыны-хотууну баҕарыаҕын!
Сэмэн Жендринскэй
Видео Наталья Сибирякова