Бэҕэһээ, о.э. муус устар 5 күнүгэр Сылаҥ нэһилиэгин Улахан Күөл учаастагын оскуолатыгар улахан суолталаах истиэндэ ыйанна. Бу туһунан биһиги уопсастыбаннай кэрэспэдьиэммит Наталья Захарова иһитинэрдэ.
Учаастак төрүт олохтоохторо Михаил Дмитриевич уонна Анна Ильинична Трофимовтар ааттарын үйэтитэргэ анаан кинилэр оҕолоро, алын сүһүөх кылаас үөрэнээччилэрин көҕүлүүр сыаллаах “Бастыҥ уопсастыбанньык үөрэнээччи” анал аат хаһаайыныгар 10 тыһыынчалаах стипендияны олохтоотулар.
Үөрүүлээ чааска алын сүһүөх кылаас оҕолоругар анаан, олохтоох ааптар —Пелагея Иннокентьевна Трофимова хоһоонун аахтылар. Төрөппүттэрин тустарынан улахан уоллара Дмитрий Михайлович дириҥ ис хоһоонноох ахтыыны оҥордо. Стипендия туһунан иккис уоллара Спартак Михайлович сырдатта, итини сэргэ, Улахан Күөл ыспартыыбынай саалата сайдарын туһугар 30 тыһыынча солкуобайы туттаран, тус кылаатын киллэрдэ.
Оскуола үөрэнээччилэрин минньигэс тордунан, утаҕынан күндүлээтилэр.
Оскуола аатыттан, олохтоох салалта, Трофимовтар халыҥ аймахха улахан махталларын биллэрдилэр. Чэгиэн доруобуйаны, ситиһиини, дьолу-соргуну баҕардылар.
Манна даҕатан эттэххэ, Анна Ильинична Трофимова – Дьоруой ийэ, сааһын тухары ыанньыксытынан үлэлээбитэ, эдэр ыччаттарга бастыҥ настаабынньык буолар оттон Михаил Дмитриевич үйэтин тухары оройуоҥҥа сыспай сиэллээҕи иитиигэ улахан кылаатын киллэсибитэ. Трофимовтар орто уоллара Спартак Михайлович билигин Амма улууһугар биллэр урбаанньыт, меценат. Сиэннэрэ Владимир Михайлович уола Афанасий билигин анал байыаннай дьайыыга сылдьар.
Үтүө, үлэһит дьон Трофимовтар ааттара үйэлэргэ ааттанан кэлэр кэнчээри ыччакка холобур буолуо туруохтара.
Сэмэн Жендринскэй